22 студзеня, Мінск /Кар. БЕЛТА/. Беларуская ўніверсальная таварная біржа гатова супрацоўнічаць з Сусветным банкам у сферы біржавога гандлю лесапрадукцыяй. Аб гэтым на сустрэчы з делегацыяй банка заявіў старшыня праўлення БУТБ Аляксандр Асмалоўскі, паведаміў карэспандэнту БЕЛТА прэс-сакратар біржы Раман Яніў.
Кіраўнік біржы адзначыў, што біржавы механізм пастаянна развіваецца і ўдасканальваецца з улікам сусветнага вопыту, патрабаванняў рынку і сучасных тэндэнцый у галіне інфармацыйных тэхналогій. "Мы заўсёды адкрытыя для новых ідэй і прапаноў, асабліва ад такой аўтарытэтнай арганізацыі, як Сусветны банк. Калі вашы рэкамендацыі і вопыт дапамогуць павысіць эфектыўнасць работы біржы і прынясуць карысць удзельнікам біржавых таргоў, мы гатовы разгледзець магчымасць іх укаранення", - падкрэсліў ён.
На біржы ўдакладнілі, што мэтай візіту дэлегацыі Сусветнага банка ў БУТБ стала неабходнасць актуалізаваць інфармацыю па пытаннях лясной гаспадаркі ў рамках праекта "Развіццё ляснога сектара Рэспублікі Беларусь". Прадстаўнікам банка былі прадастаўлены звесткі аб прынцыпах фарміравання цэн на лесаматэрыялы, мерах па падтрыманні высокага ўзроўню канкурэнцыі на біржавых таргах, ролі біржы ў дыверсіфікацыі рынкаў збыту прадукцыі лесапрамысловага комплексу і механізме забеспячэння выканання абавязацельстваў па біржавых здзелках.
Старшы кансультант СБ па лясной гаспадарцы Майлз Мак Данкадха станоўча ацаніў праведзеную біржай работу па спрашчэнні працэдуры рэгістрацыі новых кампаній і зняцці абмежаванняў па доступе на гадавыя біржавыя таргі драўнінай прадпрыемстваў малога і сярэдняга бізнесу, што дало магчымасць дасягнуць рэкордных паказчыкаў як па колькасці ўдзельнікаў, так і па аб'ёмах рэалізаванага рэсурсу. Паводле слоў эксперта, гэтыя змяненні разам з пераходам на новыя, гарманізаваныя з еўрапейскімі, стандарты якасці лесапрадукцыі, што рэалізуецца на экспарт, будуць садзейнічаць больш цеснай інтэграцыі беларускай лясной галіны ў сусветны рынак лесу.
"Гэта асабліва актуальна ў святле плануемага ўступлення Беларусі ў Сусветную гандлёвую арганізацыю", - адзначыў Майлз Мак Данкадха.-0-
