11 лістапада, Мінск /Кар. БЕЛТА/. Беларуская ўніверсальная таварная біржа плануе да канца лістапада арганізаваць таргі ферамалібдэнам на ўнутраным рынку з мэтай забеспячэння айчыннай металургічнай галіны неабходнай сыравінай, паведамілі БЕЛТА ў прэс-службе БУТБ.
Таргі будуць праводзіцца па прынцыпе адваротнага аўкцыёну (на паніжэнне цаны), а ў якасці прадаўцоў выступяць кампаніі з Беларусі, Расіі, Арменіі, Казахстана і іншых краін СНД. Распрацоўка спецыялізаванага гандлёвага модуля ўжо завершана, цяпер ён актыўна тэсціруецца будучымі карыстальнікамі. Паралельна вядзецца работа па прыцягненні на біржавую пляцоўку вытворцаў і пастаўшчыкоў ферасплаваў. Так, на палях выстаўкі "Метал-Экспа", якая праходзіць 8-11 лістапада ў Маскве, дэлегацыя БУТБ правяла перагаворы з вядучымі расійскімі заводамі-вытворцамі ферамалібдэну і іншых ферасплаваў.
"Акрамя таго, разлічваем прыцягнуць на таргі вытворцаў з іншых краін СНД. Іх удзел у маючай адбыцца гандлёвай сесіі будзе ў тым ліку садзейнічаць зніжэнню затрат беларускіх спажыўцоў, якія змогуць не толькі закупляць сыравіну ў патрэбных ім аб'ёмах, але і атрымаюць дадатковую эканомію сродкаў за кошт канкурэнцыі прадаўцоў падчас таргоў. Менавіта таму немалаважнае значэнне мае колькасць пастаўшчыкоў, гатовых рэалізоўваць сваю прадукцыю беларускім пакупнікам праз біржавую пляцоўку", - адзначылі ў прэс-службе.
ААТ "Беларуская ўніверсальная таварная біржа" створана ў 2004 годзе. Першыя таргі прайшлі ў чэрвені 2005 года. БУТБ - адна з найбуйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.
Па выніках студзеня - кастрычніка 2022 года абарот секцыі металапрадукцыі БУТБ склаў Br1,8 млрд, што на 10 працэнтаў больш за паказчык за аналагічны перыяд 2021 года. Каля 80 працэнтаў продажаў, або Br1,4 млрд, прыпала на чорныя металы і вырабы з іх.-0-
