9 верасня, Мінск /Кар. БЕЛТА/. Беларусь захавала кампетэнцыі ў прамысловасці і гатова многае прапанаваць партнёрам. Аб гэтым заявіў старшыня Мінскага гарадскога Савета дэпутатаў Андрэй Бугроў на міжнародным форуме эканамічнага супрацоўніцтва да 955-годдзя Мінска, перадае карэспандэнт БЕЛТА.
"Мінск, у якім пражывае крыху больш за 2 млн чалавек, фарміруе асноўны прамысловы патэнцыял нашай краіны. Гэта горад вялікіх магчымасцей. Мы адкрыты і заўсёды рады гасцям. Сёння мы абмяркуем шэраг пытанняў, якія датычацца развіцця не толькі беларускай сталіцы і нашай краіны ў цэлым, але і партнёрскіх адносін з іншымі дзяржавамі. Беларусь з савецкіх часоў была зборачным цэхам, менавіта тут былі вядучыя прадпрыемствы. І нам удалося захаваць кампетэнцыі. Мы выпускаем прадукцыю, каб не толькі забяспечыць свае патрэбнасці, але і прадаваць за мяжу. Якасць - тое, што заўсёды нас вызначала", - сказаў Андрэй Бугроў.
Ён падкрэсліў неабходнасць развіцця міжнародных эканамічных сувязей для фарміравання высокай дабаўленай вартасці прадукцыі, стварэння новых рабочых месцаў і вытворчасцей.
Міжнародны форум эканамічнага супрацоўніцтва праходзіць сёння ў Нацыянальнай бібліятэцы Беларусі. Ён прымеркаваны да 955-годдзя беларускай сталіцы. Таксама каля Нацыянальнай бібліятэкі адкрылася выстаўка прамысловага сектара Мінска. На ёй прадстаўлена тэхніка МТЗ, МАЗа, АМКАДОРа, "Белкамунмаша".-0-