18 лістапада, Мінск /Кар. БЕЛТА/. Меры па процідзеянні санкцыйным абмежаванням даюць пазітыўныя рэзультаты. Аб гэтым, выступаючы на пасяджэнні Савета па ўстойлівым развіцці, заявіла намеснік міністра эканомікі Таццяна Бранцэвіч, паведамілі БЕЛТА ў прэс-службе ведамства.
Паводле слоў намесніка міністра, урад своечасова прыняў меры па процідзеянні санкцыйным абмежаванням і яны ўжо даюць пазітыўныя рэзультаты. Эканоміка функцыянуе ўстойліва і пачынаючы са жніўня дэманструе паступовае аднаўленне.
"Адзін з асноўных крытэрыяў устойлівасці - удзел насельніцтва ў эканамічным жыцці краіны і, адпаведна, узровень беспрацоўя. Па выніках 9 месяцаў ён знізіўся і склаў 3,4 працэнта. Больш таго, маніторынг паказвае, што попыт на рабочую сілу расце. Другі момант у нашай рабоце - падтрымка бізнесу. У ходзе сумеснага з ПРААН праекта міжнароднай тэхнічнай дапамогі мы павышаем даступнасць мікрафінансавых паслуг у рэгіёнах для стымулявання развіцця прадпрымальніцкага сектара. У сакавіку Мінэканомікі запусціла электронны "Рэестр адміністрацыйных працэдур". Там ужо адлюстравана больш за 70 працэнтаў з іх. Развіццё рэестра прадугледжвае інтэграцыю ўнікальнага інструменту - індэкса адміністрацыйнай нагрузкі. Ён дазволіць у аўтаматычным рэжыме аналізаваць нагрузку на суб'екты гаспадарання ў рэальным часе", - расказала Таццяна Бранцэвіч.
Гаворачы пра планы на 2023 год, намеснік міністра падкрэсліла, што ключавая задача - забяспечыць рост эканомікі і рэалізаваць палажэнні праграмы пяцігодкі, адобранай шостым Усебеларускім народным сходам. Намаганні будуць сканцэнтраваны перш за ўсё на развіцці інфраструктуры, мадэрнізацыі прадпрыемстваў, рэалізацыі імпартазамяшчальных праектаў і мясцовых ініцыятыў "Адзін раён - адзін праект". Выбраны вектар цесна звязаны з Мэтамі ўстойлівага развіцця нумар 8 і нумар 9.
"Знешнія абмежаванні - гэта не толькі рызыкі выканання МУР, але і новыя магчымасці, моцная матывацыя задзейнічаць існуючыя рэзервы і падключыць усе рэсурсы для забеспячэння ўстойлівага развіцця. Сёння неабходна прыкласці максімум сумесных намаганняў, каб сумеснай працай забяспечыць рост дабрабыту беларускага народа ў бліжэйшым будучым", - рэзюмавала намеснік міністра эканомікі.-0-
