Сцяг Аўторак, 18 чэрвеня 2024
Усе навіны
Усе навіны
Эканоміка
28 мая 2024, 12:27

БПЛА для сельскай гаспадаркі і пажарная тэхніка. Беларусь і Алтайскі край маюць намер нарасціць тавараабарот

28 мая, Мінск /Кар. БЕЛТА/. Вынікі гандлёва-эканамічнага, навукова-тэхнічнага і культурнага супрацоўніцтва і перспектывы ўзаемадзеяння ва ўсіх сферах абмяркоўваюць Беларусь і Алтайскі край на 9-м пасяджэнні двухбаковай камісіі па каардынацыі супрацоўніцтва, перадае карэспандэнт БЕЛТА.

На парадку дня - вызначэнне кропак росту ў такіх сферах, як прамысловасць, аграпрамысловы комплекс, навука і адукацыя, транспарт, ЖКГ, будаўніцтва, спорт, турызм, санаторна-курортнае аздараўленне, культура. Падыход да перспектыўнага планавання зусім не фармальны.

Паводле статыстыкі, Беларусь, нягледзячы на геаграфічную аддаленасць, з'яўляецца адным з асноўных знешнегандлёвых партнёраў Алтайскага края. Больш за 20 прамысловых прадпрыемстваў Алтая супрацоўнічаюць з беларускімі кампаніямі па напрамках імпартазамяшчэння і прамкааперацыі. За 2023 год тавараабарот Беларусі і Алтайскага края ў параўнанні з 2022 годам павялічыўся на 2 працэнты і склаў $108,2 млн, экспарт вырас на 3,7 працэнта і дасягнуў адзнакі $48 млн.

Першы намеснік міністра прамысловасці Аляксандр Агароднікаў падкрэсліў, што гэта не тыя лічбы, на якіх хацелі б спыніцца партнёры, і сёння Беларусь і Алтайскі край гавораць аб неабходнасці росту тавараабароту. "Я ўпэўнены, на ўзроўні экспертаў мы зможам паглыбіцца ў кожнае з пытанняў, пачынаючы ад прамысловага ўзаемадзеяння і заканчваючы культурай, навукай, медыцынай. Усе сферы ўзаемаадносін нам вельмі і вельмі важныя. Перакананы, што Алтайскі край, як і ўсе рэгіёны Расіі, нашы лепшыя партнёры", - заўважыў Аляксандр Агароднікаў.

Губернатар Алтайскага края Віктар Таменка зрабіў акцэнт на напрамках супрацоўніцтва, якім перш за ўсё Беларусь і Алтай не ўдзялялі належнай увагі. Размова ідзе аб узаемадзеянні ў частцы выкарыстання беспілотнай лятальнай авіяцыі для грамадзянскіх мэт, а менавіта для патрэб сельскай гаспадаркі, сістэмы адукацыі і прыродаахоўнай дзейнасці, і перайманні вопыту беларускай прамысловасці па стварэнні комплексаў па перапрацоўцы цвёрдых камунальных адходаў. На думку Віктара Таменкі, паглыбленне ўзаемных кантактаў і іх выхад на больш высокі ўзровень даюць магчымасць разглядаць і магчымасць прамых авіязносін паміж Мінскам і Барнаулам. Губернатар паабяцаў удзяліць увагу закупцы пажарнай тэхнікі і аварыйна-выратавальнага абсталявання беларускай вытворчасці.

Завершыць 9-е пасяджэнне двухбаковай камісіі падпісанне пратакола і плана мерапрыемстваў на 2024-2026 гады па рэалізацыі пагаднення паміж урадам Беларусі і адміністрацыяй Алтайскага края аб гандлёва-эканамічным, навукова-тэхнічным і культурным супрацоўніцтве ад 22 кастрычніка 2014 года.-0-
Фота Надзеі Касцецкай
Падпісвайцеся на нас у
Twitter
Топ-навіны
Свежыя навіны Беларусі