18 лютага, Мінск /Кар. БЕЛТА/. Міністэрства эканомікі Беларусі зацвердзіла план правядзення стартап-мерапрыемстваў у Беларусі на 2019 год - у сталіцы і рэгіёнах пройдуць звыш 400 такіх мерапрыемстваў, гэтым зоймуцца 52 арганізацыі, паведамілі БЕЛТА ў прэс-службе міністэрства.
У плане на гэты год - розныя форумы, семінары, майстар-класы, хакатоны, стартап-школы, пітч-сесіі для інвестараў, арганізацыя сустрэч з паспяховымі прадстаўнікамі навукі і бізнесу.
У 2018 годзе ў плане было правядзенне 274 стартап-мерапрыемстваў больш як 30 арганізацыямі.
"Падтрымка стартап-руху з'яўляецца адным са значных інструментаў развіцця інавацыйнага прадпрымальніцтва ў Беларусі, работа па падтрымцы і развіцці стартап-руху прадугледжана праграмай сацыяльна-эканамічнага развіцця краіны на 2016-2020 гады", - адзначылі ў Мінэканомікі.
Практыка падрыхтоўкі штогадовых планаў правядзення стартап-мерапрыемстваў склалася з 2012 года. Такое планаванне дае магчымасць арганізатарам мерапрыемстваў карыстацца арганізацыйнай, інфармацыйнай і фінансавай падтрымкай мясцовых органаў улады. Для ўзаемадзеяння арганізатараў стартап-мерапрыемстваў з органамі дзяржкіравання вызначаны адказныя службовыя асобы аблвыканкамаў і Мінскага гарвыканкама.-0-