21 сакавіка, Мінск /Кар. БЕЛТА/. Беларускі металургічны завод прыкметна пашырыў сферу прымянення біржавога механізма ў сваёй дзейнасці ў 2023 годзе, рэгулярна выступаючы як прадаўцом, так і пакупніком прадукцыі чорнай і каляровай металургіі. Аб гэтым паведамілі БЕЛТА ў прэс-службе Беларускай універсальнай таварнай біржы.
У прыватнасці, цяпер прадпрыемства актыўна выкарыстоўвае пляцоўку БУТБ для рэалізацыі арматуры ўласнай вытворчасці на ўнутраным рынку Беларусі. Пры гэтым на таргі выстаўляюцца самыя запатрабаваныя ў айчынных спажыўцоў дыяметры - 8 мм, 10 мм і 12 мм. У выніку з пачатку года аб'ём продажаў дасягнуў амаль 1 тыс. т, што перавышае паказчык рэалізацыі за ўвесь 2022 год.
Акрамя таго, БМЗ стаў буйнейшым пакупніком ферасплаваў на біржавых таргах. Гэтаму пасадзейнічала правядзенне гандлёвых сесій з прымяненнем формульнага цэнаўтварэння, які дазваляе знізіць рызыкі прадаўца і пакупніка пры заключэнні доўгатэрміновых здзелак.
У адрозненне ад стандартнага механізма цэнаўтварэння, калі цана залежыць толькі ад бягучых суадносін попыту і прапанавання, пры формульным цэнаўтварэнні кошт тавару вызначаецца двума фактарамі: бягучай біржавой каціроўкай і прэміяй ци скідкай прадаўца, выражанай у працэнтах ад біржавой каціроўкі. "Такая схема фарміравання цаны асабліва зручная, калі біржавая здзелка заключаецца на доўгі перыяд, на працягу якога прадавец пастаўляе тавар пакупніку. Як правіла, гэта паўгода ці год. Зразумела, за гэты час кошт тавару на рынку можа істотна змяніцца ў большы або меншы бок, у выніку чаго здзелка становіцца нявыгаднай для аднаго з бакоў. Дык вось формульнае цэнаўтварэнне дапамагае нівеліраваць магчымыя цэнавыя ваганні без карэкціроўкі ўмоў здзелкі", - адзначылі ў прэс-службе.
ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з найбуйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.
ААТ "БМЗ - кіруючая кампанія холдынга "БМК" акрэдытавана на БУТБ у студзені 2014 года і цяпер удзельнічае ў біржавых таргах па секцыях металапрадукцыі, сельгаспрадукцыі і прамысловых і спажывецкіх тавараў. Пры гэтым па колькасці і аб'ёмах здзелак з металамі і металавырабамі БМЗ рэгулярна займае верхнія радкі рэйтынгу дзелавой актыўнасці, які штоквартальна публікуецца на сайце БУТБ.-0-
