17 снежня, Мінск /Уладзімір Мацвееў - БЕЛТА/. Бюджэт Беларусі на наступны год сфарміраваны зыходзячы з кансерватыўнага сцэнарыя работы эканомікі, а намінальны аб'ём рэспубліканскага бюджэту ў параўнанні з бягучым годам не павялічыцца. Аб гэтым сёння заявіў журналістам міністр фінансаў Максім Ермаловіч, перадае карэспандэнт БЕЛТА.
Паводле слоў міністра, ужо ў рамках таго бюджэту, які будзе прадстаўлены на разгляд парламентарыям, закладзена пэўная эканомія па ўсіх напрамках расходавання. "Гэта значыць бюджэт сфарміраваны па даволі жорсткім сцэнарыі развіцця эканомікі. Адпаведна, уводзіцца ў самім бюджэце рэжым эканоміі для бюджэтных арганізацый. Але гэта не азначае, што будзе нейкім чынам зніжана якасць бюджэтных паслуг. Таму што сацыяльныя напрамкі расходавання бюджэту павялічваюцца тэмпамі, якія ў два разы перавышаюць узровень інфляцыі. Мы чакаем, што па такіх асноўных артыкулах бюджэту, як ахова здароўя, адукацыя, сацыяльная палітыка, рост расходаў будзе ў рэальным выражэнні складаць 6-7 працэнтаў", - заявіў Максім Ермаловіч.
Ён асабліва падкрэсліў, што ў цэлым бюджэт традыцыйна захоўвае сваю сацыяльную накіраванасць, нягледзячы на складанасці, звязаныя з уплывам на Беларусь расійскага падатковага манеўру ў нафтавай сферы. "Мы сацыяльны складнік бюджэту не зніжаем, а наадварот павялічваем. Разам з Фондам сацыяльнай абароны насельніцтва на розныя віды сацыяльных расходаў будзе накіроўвацца больш за 60 працэнтаў усіх сродкаў, якія мае дзяржава. Гэта даволі вялікі аб'ём рэсурсаў, - удакладніў міністр. - У першую чаргу гэта звязана з сацыяльнымі выплатамі: заработная плата работнікаў бюджэтнай сферы, пенсіі, дапамогі, стыпендыі".
"Што датычыцца бюджэтных датацый і субвенцый (рэгіёнам. - Заўвага БЕЛТА), то іх аб'ём таксама павялічваецца з улікам таго, што праз іх рэалізуюцца ў асноўным сацыяльныя напрамкі ў расходаванні бюджэту. Таму рост гэтых расходаў адпавядае росту ўсяго сацыяльнага бюджэту", - расказаў Максім Ермаловіч.
Пры гэтым пашыраюцца паўнамоцтвы мясцовых органаў улады. Аблвыканкамам даецца права самастойна расходаваць пэўныя віды субвенцый. Такія, як, напрыклад, субвенцыі на ліквідацыю наступстваў катастрофы на Чарнобыльскай АЭС. "Гэтыя расходы будуць па прапанове аблвыканкамаў пераразмяркоўвацца па розных напрамках, што дасць большую аператыўнасць мясцовай уладзе ў прыняцці рашэнняў, на якія мэты выкарыстоўваць гэтыя сродкі", - растлумачыў міністр.
"Што датычыцца датацый, то мы зноў жа дамовіліся ўстанавіць для сябе нейкія сярэднетэрміновыя арыенціры. У рамках праекта бюджэту ў той рэдакцыі, у якой ён паступіць у парламент, прадугледжваецца артыкул, які абавязвае пры фарміраванні бюджэту на 2020 год прадастаўляць аб'ём падтрымкі рэгіёнам на ўзроўні не меншым, чым яна аказваецца ў 2019 годзе. Пры гэтым усе нявыкарыстаныя астаткі сродкаў, што перадаюцца ў выглядзе трансфертаў у мясцовы бюджэт, будуць захаваны за гэтым мясцовым бюджэтам", - заявіў Максім Ермаловіч.
Адказваючы на пытанне, у эканоміі на якіх расходах выяўляецца кансерватыўны сцэнарый бюджэту, Максім Ермаловіч удакладніў, што гэта звязана з дзейнасцю апарату кіравання - расходамі на ўтрыманне дзяржаўных органаў, рознымі тратамі бюджэтных арганізацый, не звязанымі з арганізацыяй асноўнага віду дзейнасці. "Значыць, гэта і камандзіровачныя, і транспартныя расходы, бягучыя расходы, якія зноў жа не звязаны з аказаннем бюджэтных паслуг", - растлумачыў ён.
У цэлым усе сацыяльныя стандарты, зыходзячы з сфарміраванага праекта бюджэту, у 2019 годзе будуць выконвацца. "На 100 працэнтаў захаваны ўсе сацыяльныя стандарты, і можна сказаць дакладна, што бюджэт сацыяльна арыентаваны. Базавае даручэнне Прэзідэнта: пры выкананні бюджэту ў 2019 годзе ўсё перавыкананне даходнай часткі залічваецца ў рэзервовы фонд і расходуецца эканомна і скрупулёзна па рашэнні кіраўніка дзяржавы. Бюджэт стабільны і збалансаваны", - сказаў журналістам намеснік кіраўніка Адміністрацыі Прэзідэнта Мікалай Снапкоў. Чакаецца, што дакумент паступіць ад кіраўніка дзяржавы ў парламент ужо 17 снежня.-0-
