13 верасня, Мінск /Кар. БЕЛТА/. Бюджэт Беларусі на 2017 год плануецца сфарміраваць з прафіцытам Br1,4 млрд. Аб гэтым паведаміў намеснік старшыні Пастаяннай камісіі па эканамічнай палітыцы Уладзіслаў Шчэпаў журналістам перад пасяджэннем камісіі, перадае карэспандэнт БЕЛТА.
"Бюджэт прафіцытны ў сувязі з неабходнасцю вяртання знешняга і ўнутранага доўгу. Гэта значыць прафіцыт плануецца менавіта для гэтага, каб мы поўнасцю выканалі свае знешнія і ўнутраныя абавязацельствы", - адзначыў Уладзіслаў Шчэпаў. Больш як Br1 млрд з сумы прафіцыту павінны скласці даходы ад вывазных пошлін на нафтапрадукты.
Уладзіслаў Шчэпаў падкрэсліў, што ў 2017 годзе захаваецца сацыяльная накіраванасць бюджэту. Запланаваны апераджальны рост расходаў на ахову здароўя і адукацыю, гэтыя сферы будуць абаронены ў першую чаргу. У прыярытэце таксама нацыянальная абарона, рэалізацыя праектаў у сферы эканомікі.
Сёння на пасяджэнні Пастаяннай камісіі па эканамічнай палітыцы абмяркоўваюцца праекты законаў "Аб унясенні дапаўненняў і змяненняў у Падатковы кодэкс Рэспублікі Беларусь" і "Аб рэспубліканскім бюджэце на 2017 год". Бюджэт на 2017 год пакуль не ўнесены ў Палату прадстаўнікоў, дэпутаты сумесна з прадстаўнікамі зацікаўленых міністэрстваў вядуць папярэднюю работу над праектам дакумента.-0-
