16 лістапада, Мінск /Кар. БЕЛТА/. НТЦ "ЛЭМТ - БелОМА" завяршае распрацоўваць узоры абноўленай версіі авіяцыйных акуляраў начнога бачання NV/G-AM, паведамілі БЕЛТА ў прэс-службе Міністэрства прамысловасці.
"Акуляры начнога бачання для пілотаў - спецыяльнае абсталяванне, якое прадастаўляе шырокі агляд прасторы ў кабіне і за яе межамі прыцемкам і ноччу. Пры гэтым магчыма выразнае чытанне сістэм індыкацыі, карт, іншых крыніц інфармацыі пры палёце, дакладнае распазнаванне буйных і адносна малых аб'ектаў для аптымальнай пабудовы маршруту (уключаючы ацэнку патэнцыяльных небяспек, такіх як высокія будынкі, лініі электраперадачы, горы, дрэвы)", - расказалі ў прэс-службе.
Акуляры могуць прымяняцца пры палётах прыцемкам і ноччу, вядзенні прыцэльнага агню з узбраення верталёта на нізкіх вышынях, а таксама з лёгкага бартавога ўзбраення на сярэдніх дыстанцыях, пры аперацыях ва ўмовах гарадской інфраструктуры (палёты на нізкіх вышынях, высокая шчыльнасць размяшчэння будынкаў, яркія крыніцы асвятлення) і начных пошукавых аперацыях над зямной і воднай паверхняй.
"Новыя акуляры NV/G-AM могуць быць выкарыстаны для такіх задач як у верталётах, так і ў самалётах, уключаючы транспартную і выратавальную авіяцыю. Іх канструкцыя была значна аблегчана. Таксама паляпшалася эрганоміка кіравання і настройкі прыбора пад канкрэтнага карыстальніка, што дае магчымасць аператару мець камфортны шырокі агляд кабіны і навакольнай прасторы з мінімальным адцягненнем увагі на рэгуляванне прыбора пры палёце", - адзначылі ў прэс-службе.
"НТЦ "ЛЭМТ" БелОМА" - кампанія, якая працуе ў галіне оптыка-электроннага высокадакладнага прыборабудавання. Ключавая спецыялізацыя прадпрыемства - даследаванні, распрацоўкі і вытворчасць оптыка-электронных прыбораў двайнога прызначэння. Акрамя таго, кампанія выпускае медыцынскае абсталяванне, кантрольна-праверачную і стэндавую апаратуру для аптычнай вытворчасці і кантролю параметраў. Прадпрыемства супрацоўнічае з навуковымі арганізацыямі Беларусі, краін СНД і іншых дзяржаў. Прадукцыя экспартуецца ў больш як 35 краін свету, уключаючы ЗША, Канаду, Швецыю, Германію, Вялікабрытанію, Японію, краіны Блізкага Усходу, Паўднёва-Усходняй Азіі і Лацінскай Амерыкі.-0-
