1 снежня, Мінск /Кар. БЕЛТА/. Канцэрн "Белнафтахім" плануе ў 2021 годзе перапрацоўку нафты на беларускіх НПЗ на ўзроўні каля 18 млн т. Аб гэтым паведаміў сёння журналістам намеснік старшыні канцэрна Уладзімір Сізаў перад пасяджэннем Прэзідыума Савета Міністраў, дзе абмяркоўваецца выкананне і актуалізацыя Стратэгіі развіцця нафтахімічнага комплексу Беларусі да 2030 года, перадае карэспандэнт БЕЛТА.
"Наконт 2021 года цяпер праводзяцца перагаворы, у якасці базавага варыянта мы разглядаем той жа аб'ём, які планавалася перапрацаваць у бягучым годзе. Гэта каля 18 млн т нафты", - сказаў Уладзімір Сізаў.
Што датычыцца магчымага змянення цэн на паліва, то, як растлумачыў намеснік старшыні "Белнафтахіма", у стратэгіі развіцця нафтахіміі гэтыя пытанні не разглядаюцца. "Унутраны рынак для нас вельмі важны, мы нацэлены на задавальненне яго патрэб у нафтапрадуктах у поўнай меры. А цэнавы фактар будзе вызначацца ў тым ліку зыходзячы са знешняй сыравіннай кан'юнктуры і таго, якім чынам нацыянальная валюта будзе паводзіць сябе ў адносінах да той валюты, у якой мы плацім за сыравіну", - пракаменціраваў Уладзімір Сізаў.-0-
