10 снежня, Мінск /Кар. БЕЛТА/. Белінвестбанк прыцягнуў крэдыт на 50 млн еўра для пашырэння магчымасцей крэдытавання мікра-, малога і сярэдняга бізнесу. Адпаведнае пагадненне банк падпісаў сёння з Еўрапейскім банкам рэканструкцыі і развіцця, перадае карэспандэнт БЕЛТА.
У прыватнасці, 15 млн еўра прадастаўляе ЕБРР, астатнія сродкі - еўрапейскія банкі. Большая частка сродкаў (дзве трэці) прадастаўляецца на тры гады, астатняя сума - на адзін год. Стаўка па крэдыце будзе выстаўляцца індывідуальна па кожнай здзелцы. "Думаю, трэба арыентавацца на кошт суверэнных бондаў", - адзначыў кіраўнік прадстаўніцтва ЕБРР у Беларусі Аляксандр Піваварскі.
Як было адзначана ў час падпісання пагаднення, сотні прадпрыемстваў мікра-, малога і сярэдняга бізнесу Беларусі атрымаюць магчымасць карыстацца крэдытамі з больш доўгімі тэрмінамі пагашэння ад Белінвестбанка дзякуючы новым рэсурсам, прадастаўленым у выглядзе А/В крэдыту, арганізаванага ЕБРР. Гэта першая такая здзелка для банка. Яна дапаможа пашырыць яго дзейнасць на міжнародным рынку і павялічыць партнёрскую сетку.
Крэдыт з'яўляецца яшчэ адным пацвярджэннем эфектыўнай работы ЕБРР і Белінвестбанка. Прыцягненне знешняга фінансавання будзе садзейнічаць далейшай дыверсіфікацыі рэсурснай базы і камерцыялізацыі банка.
ААТ "Белінвестбанк" - адзін з буйнейшых сістэмаўтваральных банкаў Беларусі. Па аб'ёме актываў і рэсурснай (кліенцкай) базе ўваходзіць у шасцёрку лідараў. З 2015 года пры падтрымцы ЕБРР у банку рэалізуецца праграма інстытуцыянальнага развіцця, накіраваная на павышэнне яго эфектыўнасці і камерцыялізацыю.
ЕБРР - міжнародны банк, які садзейнічае развіццю прыватнага сектара і прадпрымальніцкай ініцыятывы ў 38 эканоміках на трох кантынентах. Беларусь з'яўляецца членам Еўрапейскага банка рэканструкцыі і развіцця з 1992 года. З пачатку сваёй дзейнасці ў Беларусі ЕБРР інвесціраваў больш за 2 млрд еўра ў праекты ў розных сектарах эканомікі краіны.-0-
