15 верасня, Мінск /Кар. БЕЛТА/. Беларуская гандлёва-прамысловая палата ў верасні - кастрычніку правядзе серыю анлайн-мерапрыемстваў для падтрымкі бізнесу, паведамілі БЕЛТА ў БелГПП.
Мэта - пашырэнне экспарту беларускіх кампаній, прэзентацыя новых напрамкаў падтрымкі экспартна арыентаванага бізнесу, захаванне існуючых і ўстанаўленне новых кантактаў айчынных прадпрыемстваў з замежнымі партнёрамі, пераадоленне наступстваў спаду дзелавой актыўнасці, выкліканага пандэміяй.
Усяго запланавана сем розных мерапрыемстваў: стрымаў, практычных вэбінараў і круглых сталоў. Анлайн-стрымы кіраўнікоў структурных падраздзяленняў БелГПП бліжэй азнаёмяць беларускія дзелавыя колы з новымі напрамкамі дзейнасці палаты і планамі. У час практычных вэбінараў і круглых сталоў будуць разгледжаны актуальныя пытанні знешнеэканамічнай дзейнасці, магчымасці гандлёва-эканамічнага супрацоўніцтва з канкрэтнымі краінамі.
Адкрые серыю мерапрыемстваў анлайн-стрым "Акадэмія экспарту: умовы ўдзелу". Ён пройдзе 17 верасня і будзе прысвечаны прэзентацыі бізнес-курса "Акадэміі экспарту" - праекта Беларускай гандлёва-прамысловай палаты, аналагаў якому няма ў краіне.
22 верасня БелГПП правядзе практычны вэбінар "Усё аб выстаўках: як пазітыўна завяршыць 2020 год, новаўвядзенні для ўдзельнікаў нацыянальных выставак, план на 2021 год, як атрымаць дзяржаўную падтрымку ўдзелу ў выстаўках". У час вэбінара прадстаўнікі палаты раскажуць аб запланаваных да канца года выстаўках, а таксама найбольш перспектыўных мерапрыемствах у наступным годзе. Акрамя таго, на вэбінары БелГПП з Міністэрствам фінансаў і аблвыканкамамі прэзентуюць бізнесу магчымасці дзяржпадтрымкі ўдзелу ў выстаўках з растлумачэннем заканадаўства і падрабязнымі рэкамендацыямі, як атрымаць такую падтрымку.
23 верасня прадстаўнікі бізнес-колаў Беларусі і Малдовы абмяркуюць перспектывы двухбаковага ўзаемадзеяння, абмежаванні, якія ўзніклі ў сувязі з эпідабстаноўкай, антыкрызісныя меры, каб мінімізаваць наступствы спаду дзелавой актыўнасці.
24 верасня адбудзецца анлайн-стрым "Паслуга БелГПП па прыёмцы тавараў: на што звярнуць увагу пры заключэнні гандлёвых кантрактаў", а 29 верасня ўвазе дзелавых колаў будуць прадстаўлены перавагі выкарыстання карнета АТА - інструменту спрошчанага часовага ўвозу тавараў у замежныя дзяржавы.
30 верасня эксперты БелГПП і Дзяржаўнага мытнага камітэта Беларусі падрабязна раскажуць аб рэгістрацыі беларускіх прадпрыемстваў і арганізацый, якія плануюць экспарт у Нарвегію або Швейцарыю, у сістэме зарэгістраваных экспарцёраў (REX).
1 кастрычніка БелГПП прадставіць магчымасці аховы таварнымі знакамі за мяжой прадукцыі беларускіх экспарцёраў.-0-
