БЕЛАЗ і горназдабыўныя прадпрыемствы Амурскай вобласці маюць намер нарошчваць супрацоўніцтва

23 ліпеня, Мінск /Кар. БЕЛТА/. БЕЛАЗ і горназдабыўныя прадпрыемствы Амурскай вобласці маюць намер нарошчваць супрацоўніцтва. Аб гэтым ішла размова ў ходзе дзелавога візіту ўрадавай дэлегацыі Амурскай вобласці, якая наведала БЕЛАЗ, паведамілі БЕЛТА ў прэс-службе прадпрыемства.

Тэхніка БЕЛАЗ працуе на 11 горназдабыўных прадпрыемствах Амурскай вобласці. Іх парк у цэлым складаюць 169 самазвалаў грузападымальнасцю ад 30 да 130 т.

На БЕЛАЗе гасцей з далёкаўсходняга рэгіёна азнаёмілі з гісторыяй і вытворчымі магутнасцямі завода, зборачным працэсам і мадэльным радам выпускаемай тэхнікі. Асаблівае ўражанне на дэлегацыю зрабіў 90-тонны электрасамазвал БЕЛАЗ-7558Е, спецыяльны тэст-драйв якога быў арганізаваны для гасцей на выпрабавальным палігоне завода.

"Вельмі добрая машына, - адзначыў намеснік старшыні ўрада расійскага рэгіёна Алег Туркоў, ацэньваючы 90-тонны самазвал на акумулятарных батарэях. - Вы выпускаеце дастойную, канкурэнтную тэхніку, якая запатрабавана на сусветным рынку. У горназдабыўных прадпрыемстваў Амурскай вобласці таксама ёсць планы па набыцці кар'ерных самазвалаў БЕЛАЗ, і я ўпэўнены, што яны будуць рэалізаваны".-0-