21 лістапада, Мінск /Кар. БЕЛТА/. Экспазіцыя беларускіх вытворцаў Made in Belarus адкрылася на міжнароднай выстаўцы сельскай гаспадаркі і харчовай прамысловасці Agro Food Drink Tech Expo, якая праходзіць з 20 па 22 лістапада ў Тбілісі (Грузія). Аб гэтым БЕЛТА паведамілі ў выставачным унітарным прадпрыемстве "Белінтэрэкспа" Беларускай гандлёва-прамысловай палаты.
Экспазіцыя беларускіх вытворцаў, якая стала самай вялікай на выстаўцы, праходзіць пад дэвізам "Высокая якасць, надзейныя партнёры". Сваю прадукцыю прадстаўляюць дзесяць беларускіх прадпрыемстваў. "Бабуліна крынка" прэзентуе адразу тры навінкі. Гэта пітное стэрылізаванае малако "Школьнік", абагачанае інсулінам, малако "Вітамінка" з кальцыем і вітамінам Д3, малако для харчавання дзяцей ранняга ўзросту з масавай доляй тлушчу 3,5 працэнта. "Малочны гасцінец" прапануе натуральнамалочную і кісламалочную прадукцыю, уключаючы тварожныя вырабы, плаўленыя і паўцвёрдыя сыры, сметанковае масла, натуральныя малочныя кактэйлі з рознымі смакавымі дабаўкамі. Упершыню сваю прадукцыю ў Грузіі прадстаўляюць "Смаргонскія малочныя прадукты" філіял ААТ "Лідскі малочнакансервавы камбінат". Кампанія прапануе сухое абястлушчанае і сухое неразведзенае малако, сметанковае масла з масавай доляй тлушчу 82,5 працэнта, тварог пад брэндам "Смаргонскі край".
Ваўкавыскі мясакамбінат прадстаўляе мясныя далікатэсы са свініны, ялавічыны і мяса птушкі, Магілёўскі мясакамбінат - навінкі мясной прадукцыі, сярод якіх каўбасы, мясныя паўфабрыкаты, мяса і субпрадукты. Ашмянскі мясакамбінат прывёз на выстаўку шырокі асартымент каўбасных вырабаў, сыравэнджанай і сыравяленай прадукцыі, вяндліны і паўфабрыкатаў. Гэта прадпрыемства яшчэ не прадстаўлена на грузінскім рынку і шукае надзейных партнёраў.
"Марозпрадукт" прапануе папулярныя маркі марожанага, а таксама замарожаныя мясныя і рыбныя паўфабрыкаты, хлеб, агародніну і ягады, вырабы з бульбы, пельмені ўласнай вытворчасці. Быхаўскі кансервава-агароднінасушыльны завод дэманструе кансерваваную натуральным спосабам прадукцыю, уключаючы плодаагароднінныя кансервы, сокі, павідла, варэнні, кансервы, марынады, таматныя пасты і соусы, салаты, закускі, гарніры. Асаблівай папулярнасцю ў наведвальнікаў карыстаюцца дэгустацыі бярозавага соку.
Холдынг "Гомсельмаш" дэманструе бульбакапалку-пагрузчык КМП-1,5, які распрацаваны па заказе грузінскіх партнёраў і прайшоў палявыя выпрабаванні. Прадстаўлена сельгастэхніка гандлёвай маркі "Палессе": збожжаўборачны камбайн КЗС-10К і кормаўборачныя самаходныя машыны КСК-600 і КВК-800 з панарамным шкленнем кабіны, аўтаматызаваным кіраваннем і аховай ад спёкі, шуму і пылу. Тэхніка прадстаўлена ў тым ліку ў выглядзе натурных узораў на адкрытай пляцоўцы. У гэтым годзе на грузінскім рынку рэалізавана 30 камбайнаў "Палессе".
Прадпрыемства "Лідаграпраммаш" паказала на выстаўцы навінку - сеялку дакладнага высеву СТВ-4КУ, а таксама сеялку пнеўматычную ўніверсальную СПУ-4Д.
Адкрыццё беларускай экспазіцыі суправаджаў бізнес-форум "Грузія - Беларусь: перспектывы супрацоўніцтва", у якім прынялі ўдзел пасол Беларусі ў Грузіі Міхаіл Мятлікаў, прэзідэнт Гандлёва-прамысловай палаты Грузіі Ніно Чыкавані, першы намеснік міністра аховы навакольнага асяроддзя і сельскай гаспадаркі Грузіі Надар Керэселідзэ. Мерапрыемствы арганізаваны прадпрыемствам "Белінтэрэкспа" БелГПП пры ўдзеле і садзейнічанні пасольства Беларусі ў Грузіі і Гандлёва-прамысловай палаты Грузіі.
У выстаўцы прымаюць удзел звыш 120 кампаній з 14 краін.-0-
