28 снежня, Масква /Эдуард Півавар - БЕЛТА/. Аб'ём беларускага экспарту ў Арэнбургскую вобласць Расіі за 10 месяцаў гэтага года вырас больш як на 65 працэнтаў у параўнанні з аналагічным перыядам 2021 года. Такія даныя прагучалі 28 снежня на пасяджэнні беларускай часткі рабочай групы па супрацоўніцтве Беларусі і Арэнбургскай вобласці, паведамілі БЕЛТА ў прэс-службе пасольства Беларусі ў Расіі.
Сярод найбольш значных мерапрыемстваў, праведзеных бакамі ў адыходзячым годзе, адзначаны візіт Арэнбургскай вобласці ў Беларусь і наведванне ёю шэрага беларускіх прадпрыемстваў, адкрыццё ў Арэнбургу магазіна па рэалізацыі беларускіх тавараў лёгкай прамысловасці, пастаўкі арэнбургскаму прадпрыемству самазвалаў "БЕЛАЗ" на суму большую за $11 млн, візіт спецыялістаў прадпрыемства "Белшына" для вывучэння магчымасці пашырэння паставак шыннай прадукцыі ў гэты расійскі рэгіён.
"У ходзе пасяджэння таксама абазначаны планы на 2023 год, у тым ліку запланаваны ў красавіку 2023 года візіт у Беларусь дэлегацыі Арэнбургскай вобласці на чале з губернатарам Дзянісам Паслерам для правядзення сустрэч і перагавораў на вышэйшым і высокім узроўнях, наведвання прамысловых і сельскагаспадарчых прадпрыемстваў краіны", - расказалі ў прэс-службе.
Удзельнікамі пасяджэння ў рэжыме відэаканферэнцыі сталі прадстаўнікі пасольства Беларусі ў Расіі, БелГПП, НАН Беларусі, Мінпрама, Мінсельгасхарча, Мінбудархітэктуры, Мінтранса, Міністэрства аховы здароўя, Мінспорту, Мінадукацыі, канцэрнаў "Беллеспаперапрам", "Белнафтахім і "Белдзяржхарчпрам".-0-
