20 жніўня, Мінск /Кар. БЕЛТА/. Беларусі патрэбны моцны інтэлектуальны стратэгічны штаб па развіцці лічбавай эканомікі, заявіў першы намеснік прэм'ер-міністра Аляксандр Турчын, прадстаўляючы калектыву новага міністра сувязі і інфарматызацыі Канстанціна Шульгана, перадае карэспандэнт БЕЛТА.
"Ключавая задача новага міністра і ўсяго міністэрства - пераадолець ведамасную, галіновую інерцыю. Краіне трэба не міністэрства сувязі ў вузкім, галіновым сэнсе, і нават не цэнтр інфарматызацыі, а моцны інтэлектуальны, стратэгічны штаб па развіцці лічбавай эканомікі ў маштабах усёй краіны. Ваша задача - гэта не толькі і не столькі інфраструктура. Развіццё оптавалакна, 4G, электронных паслуг - гэта ўсё, вядома, важна. Але гэта толькі малая частка работы, якая ўскладзена на вас. Перш за ўсё ў фокусе вашай увагі павінен быць перавод у лічбавы фармат усёй эканомікі краіны. Вобразна кажучы, спектр вашых задач - ад індустрыі 4.0 у прамысловасці і дакладнага земляробства ў сельскай гаспадарцы да стварэння паўнацэннай сістэмы электроннай медыцыны ў краіне. Менавіта ваша ведамства павінна даць дакладную, зразумелую і канкрэтную стратэгію пераводу ў лічбавы фармат усіх іншых галін і ўсёй эканомікі ў цэлым. І не толькі даць яе ў тэорыі, але і валявым чынам прабіваць на практыцы", - сказаў Аляксандр Турчын.
Першы віцэ-прэм'ер падкрэсліў, што, гаворачы пра перавод у лічбавы фармат, мае на ўвазе не ўкараненне электроннага дакументаабароту, а паўнацэнны пераход на новыя лічбавыя тэхналогіі і вытворчыя мадэлі. "Кіраўніцтва ўрада, і я ў прыватнасці, не толькі акажам вам усялякае ў гэтым садзейнічанне, а фактычна мы будзем рабіць гэта разам. Лічбавая эканоміка - гэта прыярытэт нумар адзін і ўрада, і краіны ў цэлым. І са свайго боку я магу гарантаваць, што ў ліку маіх абавязкаў работа па лічбавізацыі эканомікі і работа з вашым міністэрствам будзе стаяць на першым месцы", - заявіў ён.
"Паўтара года таму Прэзідэнт аб'явіў курс на пабудову ІТ-краіны. Скептыкі думалі, што гэта не больш чым яркая фраза. Але вы ведаеце, што словы кіраўніка дзяржавы ніколі не разыходзяцца са справай. Прэзідэнтам быў прыняты рэвалюцыйны дэкрэт нумар 8 "Аб развіцці лічбавай эканомікі". Пасля прыняцця дэкрэта аб Беларусі ў пазітыўным ключы загаварылі ва ўсім свеце. Сёння вельмі паспяхова працуе наш Парк высокіх тэхналогій. У мінулым годзе яго экспарт рэзка вырас і ўпершыню перасягнуў мільярд долараў. У гэтым годзе мы бачым скачок колькасці кампаній, што ўступаюць ПВТ, і яшчэ большы рост экспарту, які перасягае ўсе прагнозы. Пра ўсё гэта гаварыў у сваім пасланні кіраўнік дзяржавы. Гэта, можна сказаць, першыя крокі па пабудове ІТ-краіны. Сёння надыходзіць час наступнага этапу. Следам за паркам, за ІТ-сферай павінна падцягвацца і ўся астатняя эканоміка", - перакананы Аляксандр Турчын.
У сувязі з гэтым быў створаны Савет па развіцці лічбавай эканомікі, і кіраўнік дзяржавы даў даручэнне прапрацаваць пытанне аб стварэнні міністэрства лічбавай эканомікі. "У гэтым жа шэрагу і назначэнне новага міністра - Канстанціна Канстанцінавіча Шульгана. У гэтай сферы ён чалавек абсалютна не новы. Канстанцін Канстанцінавіч займаўся непасрэдна інфарматызацыяй апошнія некалькі гадоў. Менавіта Аператыўна-аналітычнаму цэнтру былі дадзены паўнамоцтвы па стварэнні электроннага ўрада. Усе яны былі сканцэнтраваны ў Нацыянальным цэнтры электронных паслуг. Адначасова менавіта ААЦ займаўся стварэннем агульнай платформы для дзяржорганаў", - адзначыў першы віцэ-прэм'ер.
"Задачы, якія агучаны першым намеснікам прэм'ер-міністра, зразумелыя, яны выконваліся і да гэтага часу. Работа вядзецца, але хацелася б яе паскорыць, каб усе ўбачылі вынік. У першую чаргу мы хацелі б выканаць такую задачу, як стварэнне інфраструктуры для электронных паслуг, электроннага ўрада, на аснове якой будзе адбывацца лічбавая трансфармацыя эканомікі", - дадаў Канстанцін Шульган.
Канстанцін Шульган у 1989-1995 гадах праходзіў службу на пасадах інжынера трэцяга аддзела вайсковай часці 51458 і старшага афіцэра чацвёртага аддзела Дзяржаўнага цэнтра бяспекі інфармацыі пры Міністэрстве абароны Беларусі. Затым па чэрвень 2008 года займаў пасады старшага афіцэра, галоўнага спецыяліста, начальніка групы, начальніка аддзела ў структуры Дзяржаўнага цэнтра бяспекі інфармацыі пры Савеце бяспекі Беларусі.
У 2008-2013 гадах праходзіў ваенную службу на афіцэрскіх пасадах у Аператыўна-аналітычным цэнтры пры Прэзідэнце Беларусі. У красавіку 2016 года назначаны намеснікам начальніка ААЦ.-0-
