29 красавіка, Мінск /Кар. БЕЛТА/. Перспектывы рэалізацыі сумесных праектаў разгледжаны ў час візіту дэлегацыі дзяржаўнага вытворчага аб'яднання "Белпалівагаз" на чале з намеснікам генеральнага дырэктара ДВА Валерыем Кавалёвым у Ташкент, дзе прайшлі перагаворы з кіраўніцтвам Дзяржаўнага камітэта лясной гаспадаркі Узбекістана. Візіт праходзіў з 25 па 28 красавіка, паведамілі БЕЛТА ў прэс-службе Мінэнерга.
Разгледжаны магчымасці арганізацыі паставак беларускіх тарфяных субстратаў лесагаспадарчым вытворчасцям Узбекістана для далейшага выкарыстання ў якасці асновы для вырошчвання саджанцаў лясных насаджэнняў. Тарфяныя заводы Беларусі маюць добры вопыт у сферы вытворчасці грунтоў для высадкі насення і вырошчвання саджанцаў дрэў для лесагаспадарчых арганізацый і гатовы экспартаваць гэту прадукцыю на рынак Узбекістана. Бакі выказалі ўзаемную зацікаўленасць ва ўзаемавыгадным партнёрстве. У бліжэйшы час будуць адпрацаваны лагістыка паставак і ўмовы ўзаемадзеяння.
Арганізацыі тарфяной прамысловасці ДВА "Белпалівагаз" пастаўляюць на знешнія рынкі як паліўны торф, так і тарфяную прадукцыю няпаліўнага прызначэння. У 2021 годзе экспарт вырас на 27,3 працэнта ў параўнанні з 2020 годам і склаў 200,4 тыс. т. Торф пастаўляўся ў 24 краіны.-0-
