Беларусь зацікаўлена ў пашырэнні паставак малочнай прадукцыі ў Інданезію

27 студзеня, Мінск /Кар. БЕЛТА/. Беларусь зацікаўлена ў пашырэнні паставак малочнай прадукцыі ў Інданезію. Аб гэтым заявіў намеснік міністра сельскай гаспадаркі і харчавання Іван Смільгінь на сустрэчы з дэлегацыяй Генеральнага дырэктарата жывёлагадоўлі і ветэрынарыі Міністэрства сельскай гаспадаркі Інданезіі, паведамілі БЕЛТА ў прэс-службе Міністэрства сельскай гаспадаркі і харчавання. 

Візіт праходзіць у рамках афіцыйнай інспекцыі, накіраванай на ацэнку адпаведнасці беларускіх малакаперапрацоўчых прадпрыемстваў патрабаванням інданезійскага заканадаўства ў галіне стандартаў і харчовай бяспекі.

"Такія інспекцыі - неад'емная частка міжнароднай гандлёвай практыкі. Перад тым як дазволіць імпарт прадукцыі жывёльнага паходжання, краіны-імпарцёры абавязаны пераканацца ў надзейнасці сістэмы ветэрынарнага і санітарнага кантролю экспартуючага боку. Інспекцыя ўключае праверку ўсяго ланцужка - ад фермы да гатовага прадукту: умоў утрымання жывёл, лабараторнага маніторынгу, прытрымлівання тэхналагічных рэгламентаў, дакументаабароту і механізмаў сертыфікацыі. Толькі пасля станоўчага заключэння інспектараў адкрываецца шлях да афіцыйнага экспарту", - растлумачылі ў прэс-службе. 

На сустрэчы абмяркоўваліся ключавыя аспекты функцыянавання беларускай сістэмы бяспекі малочнай прадукцыі: арганізацыйная структура ветэрынарнай службы і органаў дзяржаўнага кантролю, нарматыўна-прававая база ў галіне ветэрынарыі і харчовай бяспекі, сістэма лабараторнага маніторынгу прадукцыі жывёльнага паходжання, праграмы прафілактыкі і барацьбы з хваробамі жывёл, парадак выдачы экспартных сертыфікатаў. 

У бліжэйшыя дні інданезійскія спецыялісты наведаюць 13 малакаперапрацоўчых прадпрыемстваў і прылеглыя сыравінныя зоны.

"Мы шчыра зацікаўлены ў развіцці партнёрства з нашымі сябрамі з Інданезіі. У нас ужо ёсць чатыры прадпрыемствы, акрэдытаваныя для паставак малочнай прадукцыі, але мы хочам, каб іх стала больш. Менавіта таму запрасілі вядучых экспертаў вашай краіны правесці незалежную, усебаковую інспекцыю. Увесь маршрут старанна прадуманы: вы ўбачыце поўны цыкл вытворчасці. Што датычыцца якасці, то тут мы спакойныя. Беларусь экспартуе малочную прадукцыю больш як у 100 краін свету, і гэта лепшае сведчанне таго, што наша сістэма кантролю надзейная, празрыстая і адпавядае самым строгім міжнародным стандартам", - адзначыў Іван Смільгінь.

На ўсіх этапах інспекцыі інданезійскую камісію будуць суправаджаць спецыялісты Міністэрства сельскай гаспадаркі і харчавання. Спецыялісты дэлегацыі пацвердзілі гатоўнасць да канструктыўнага дыялогу і намер ажыццявіць праверку максімальна аб'ектыўна і дэталёва. Канчатковае рашэнне будзе прынята па выніках аналізу матэрыялаў інспекцыі і разгледжана на міжведамасным узроўні.-0-