31 студзеня, Мінск /Кар. БЕЛТА/. Беларусь выступае за сістэмныя механізмы для ўстаранення бар'ераў і абмежаванняў у Еўразійскім эканамічным саюзе, паведаміў сёння журналістам прэм'ер-міністр Сяргей Румас па выніках пасяджэння Еўразійскага міжурадавага савета, паведамляе карэспандэнт БЕЛТА.
"У сваёй праграме старшынствавання Беларусь хоча прадугледзець стварэнне сістэмных механізмаў у рабоце з бар'ерамі, выключэннямі і абмежаваннямі. Першая прапанова - будаваць работу па ўстараненні бар'ераў на ўнутраных рынках на некансэнсусных механізмах. Сёння атрымліваецца, што краіна - ініцыятар абмежавальнай меры даказвае, што ўвядзенне ёю абмежавання правамерна", - адзначыў Сяргей Румас.
Прапанова беларускага боку - перадаць разгляд гэтых пытанняў на ўзровень Калегіі ЕЭК. На думку кіраўніка беларускага ўрада, там ёсць спецыялісты, якія павінны паглыбляцца ў гэтыя пытанні і абавязваць краіну ўстараняць бар'еры.
Яшчэ адна ініцыятыва датычыцца зваротаў у судовыя органы. Сяргей Румас звярнуў увагу, што аператыўнасць вырашэння пытанняў аб бар'ерах крытычна важна для бізнесу. Трэба адыходзіць ад таго, каб бізнес звяртаўся ў суд наконт бар'ераў. "Мы прапануем, каб краіна, якая не згодна з рашэннем Калегіі ЕЭК аб устараненні бар'ераў, даказвала самастойна ў судзе, што калегія прыняла рашэнне няправільнае. Гэта моцная навацыя, яна закране ўсе дзяржавы, у тым ліку Беларусь. Але калі мы хочам пазбавіцца ад бар'ераў, то павінны гэтым шляхам ісці", - заявіў прэм'ер-міністр.
Цяпер у спісе бар'ераў, абмежаванняў і перашкод у ЕАЭС - 71 такое дзеянне. Чатыры гады таму было 60 бар'ераў, і гэта нягледзячы на тое, што практычна на кожным пасяджэнні Еўразійскага міжурадавага савета некалькі абмежаванняў здымаецца. Аднак, паводле слоў Сяргея Румаса, іх колькасць расце ў асноўным не з-за ўводу новых бар'ераў краінамі, а таму што Калегія ЕЭК больш паглыбляецца ў работу нацыянальных эканомік і знаходзіць новыя бар'еры або абмежаванні, якія перашкаджаюць унутранаму гандлю.
Гаворачы аб тым, што рабіць з дзеючымі бар'ерамі, Сяргей Румас адзначыў, што ёсць прапановы аб іх адмене адзіным пакетам. "Гэта складанае пытанне. Ёсць розныя бар'еры і абмежаванні па вазе, тэрмінах, уплыве на эканоміку, але па гэтым шляху трэба рухацца. Першае даручэнне беларускаму старшыні калегіі будзе прапрацаваць з усімі краінамі і атрымаць іх пазіцыю: ці гатовы краіны вырашыць праблему пакетам", - дадаў кіраўнік беларускага ўрада.-0-
