28 сакавіка, Мінск /Кар. БЕЛТА/. Беларусь уводзіць часовае ліцэнзаванне вывазу за межы краіны пшаніцы, жыта, ячменю, аўса, кукурузы, грэчкі, проса, трыцікале, іншых злакаў. Гэта прадугледжана пастановай Савета Міністраў ад 24 сакавіка 2023 года нумар 207, якая афіцыйна апублікавана 28 сакавіка на Нацыянальным прававым інтэрнэт-партале, паведамляе БЕЛТА.
У пераліку тавараў, у адносінах да якіх будзе дзейнічаць часовае ліцэнзаванне вывазу, таксама зерне драблёнае, апрацаванае пшаніцы, жыта, іншых злакавых, насенне рапсу, сланечніка.
Як адзначана ў пастанове, вываз названых тавараў за межы Беларусі ажыццяўляецца па разавых ліцэнзіях, якія выдаюцца Міністэрствам антыманапольнага рэгулявання і гандлю па ўзгадненні з аблвыканкамамі, Мінскім гарвыканкамам. Разавыя ліцэнзіі выдаюцца ў парадку, аналагічным устаноўленаму правіламі выдачы ліцэнзій і дазволаў на экспарт і (або) імпарт тавараў, прадугледжанымі дадаткам да пратакола аб мерах нетарыфнага рэгулявання ў адносінах да трэціх краін (дадатак нумар 7 да Дагавора аб Еўразійскім эканамічным саюзе ад 29 мая 2014 года).
Галоўная дзяржаўная інспекцыя па насенняводстве, каранціне і ахове раслін і яе тэрытарыяльныя арганізацыі ў абласцях ажыццяўляюць выдачу фітасанітарных сертыфікатаў на вывозімыя за межы Беларусі названыя ў дакуменце тавары пры наяўнасці ліцэнзіі на іх вываз.
Дзеянне пастановы не распаўсюджваецца на тавары, якія вывозяцца ў дзяржавы - члены ЕАЭС і дзяржавы, якія не з'яўляюцца членамі ЕАЭС, для аказання міжнароднай гуманітарнай дапамогі на аснове рашэнняў урада Беларусі, а таксама ў якасці прыпасаў. Дакумент не датычыцца і тавараў, што перамяшчаюцца ў рамках міжнародных транзітных перавозак, якія пачынаюцца і заканчваюцца за межамі мытнай тэрыторыі ЕАЭС, і якія пачынаюцца за межамі мытнай тэрыторыі ЕАЭС і заканчваюцца ў дзяржаве - члене ЕАЭС, а таксама змешчаных пад мытныя працэдуры ў краіне ЕАЭС і перамяшчаемых транзітам праз Беларусь.
Пастанова ўступае ў сілу з дня яе апублікавання і дзейнічае на працягу шасці месяцаў.-0-
