14 мая, Мінск /Кар. БЕЛТА/. Беларусь у перспектыве плануе новую праграму з Міжнародным валютным фондам (МВФ). Аб гэтым заявіў сёння міністр фінансаў Максім Ермаловіч на Дні фінансавых інстытутаў, перадае карэспандэнт БЕЛТА.
Адказваючы на пытанне, ці плануецца ў бліжэйшай перспектыве пашырэнне супрацоўніцтва з міжнароднымі фінансавымі арганізацыямі, напрыклад, падпісанне новай праграмы з МВФ, кіраўнік Мінфіна сказаў: "Так, плануецца, калі разглядаць гэтыя планы як доўгатэрміновыя".
Максім Ермаловіч лічыць, што Беларусь гатова да рэалізацыі новай праграмы з Міжнародным валютным фондам. "Захоўваецца вельмі важны аспект гэтай комплекснай праграмы - поўнамаштабная рэформа дзяржаўнага сектара. Мы вельмі доўга і падрабязна працавалі ў гэтым напрамку з Сусветным банкам, менавіта ў частцы структурных рэформ па павышэнні эфектыўнасці дзяржаўнага сектара, выпрацавалі цэлы набор мер, якія ўрад, незалежна ад таго, будзе праграма з МВФ ці не, будзе рэалізоўваць", - сказаў кіраўнік Мінфіна.
Сёння павышэнне эфектыўнасці дзяржаўнага сектара - ключавая задача эканамічнай палітыкі. "Яна будзе рэалізоўвацца праз усе каналы, даступныя для ўрада і цэнтральнага банка: праз бюджэтную палітыку, манетарную, праз нашу рэформу карпаратыўнага кіравання на дзяржаўных прадпрыемствах. Гэту задачу ў бліжэйшы час неабходна вырашыць", - расказаў Максім Ермаловіч.
"Калі гаварыць пра бліжэйшую перспектыву, то ў нас ёсць дакладная стратэгія супрацоўніцтва з міжнароднымі фінансавымі арганізацыямі, мы вітаем пашырэнне мандата Еўрапейскага інвестыцыйнага банка на тэрыторыі Рэспублікі Беларусь, вельмі пазітыўныя крокі робяцца з боку Азіяцкага банка інфраструктурных інвестыцый па пачатку аперацый у Беларусі, - адзначыў міністр. - У нас традыцыйна добрае супрацоўніцтва з Міжнародным банкам рэканструкцыі і развіцця, з Еўрапейскім банкам рэканструкцыі і развіцця, шмат праектаў знаходзіцца ў стадыі падрыхтоўкі і рэалізацыі".
Асноўная мэта гэтага супрацоўніцтва, паводле слоў Максіма Ермаловіча, заключаецца ў тым, каб кампенсаваць вымушанае скарачэнне капітальных расходаў бюджэту для таго, каб забяспечваць пастаяннае аднаўленне добра развітой інфраструктуры краіны (дарожнай, энергетычнай, камунальнай). "Мы павінны падтрымліваць высокі ўзровень капітальных расходаў бюджэту. Каб гэта рабіць, улічваючы высокія расходы па абслугоўванні і пагашэнні дзяржаўнага доўгу, усё яшчэ існуючай патрэбнасці ў аказанні дзяржаўнай падтрымкі прадпрыемстваў, мы павінны нечым гэтыя расходы замяшчаць. Самая, на нашу думку, аптымальная крыніца - гэта фінансаванне з боку міжнародных інстытутаў развіцця", - растлумачыў Максім Ермаловіч.-0-
