Беларусь прапануе Азербайджану адмяніць дарожны збор для беларускіх перавозчыкаў

 

27 мая, Мінск /Кар. БЕЛТА/. Беларусь прапануе адмяніць дарожны збор у адносінах да беларускіх перавозчыкаў на тэрыторыі Азербайджана. Аб гэтым заявіў намеснік міністра транспарту і камунікацый Рэспублікі Беларусь Сяргей Дубіна ў рэжыме відэа-канферэнц-сувязі на круглым стале "Фарміраванне транспартнага каркаса Еўразіі і значная роля Азербайджана ў гэтым працэсе" па тэме "Спалучэнне міжнароднага транспартнага калідора Поўнач - Поўдзень з іншымі транспартнымі калідорамі, якія праходзяць праз Азербайджан", паведамілі БЕЛТА ў пасольстве Беларусі ў Азербайджане.

"Любы лагістычны праект можа задзейнічаць свой патэнцыял, пастаянна павышаючы канкурэнтаздольнасць. Дастаўка тавараў па калідоры Поўнач - Поўдзень з улікам шматлікіх перагрузак з аднаго віду транспарту на іншы павышае рызыкі падаражэння перавозкі. Менавіта таму так важна выбудоўванне эфектыўнай лагістыкі, фарміраванне комплексных ставак на ўвесь шлях руху па калідоры, спрашчэнне розных працэдур, што ў выніку дасць магчымасць дасягнуць істотнага прыросту работы для ўсіх удзельнікаў праекта", - адзначыў Сяргей Дубіна.

Ён назваў важным прадаўжэнне работы па зняцці бар'ераў па перавозцы аўтамабільным транспартам. Так, у мэтах росту ўзаемнага тавараабароту паміж краінамі, а таксама дынамічнага развіцця сферы міжнародных аўтамабільных перавозак грузаў беларускім бокам было прапанавана азербайджанскаму боку разгледзець магчымасць адмены дазвольнай сістэмы на ўсе віды аўтамабільных перавозак.

"Наступным крокам прапануем разгледзець адмену дарожнага збору ў адносінах да беларускіх перавозчыкаў на тэрыторыі Азербайджана. Рэспублікай Беларусь яшчэ ў 2019 годзе адменены збор за праезд аўтатранспартных сродкаў замежных дзяржаў па дарогах агульнага карыстання. Лічу, што выраўноўванне ўмоў спагнання дарожнага збору паміж дзвюма краінамі дасць магчымасць нарасціць грузапаток праз тэрыторыю Азербайджанскай Рэспублікі", - сказаў Сяргей Дубіна.

На яго думку, узаемныя ўмовы краін па развіцці міжнароднага транспартнага калідора Поўнач - Поўдзень дадуць магчымасць вырашыць існуючыя пытанні, стварыць зачын для плённага супрацоўніцтва па павелічэнні грузапатоку і ў канчатковым выніку забяспечыць рост эканомік краін-удзельніц.

"Міжнародныя транспартныя калідоры маюць важнае значэнне для развіцця гандлёва-эканамічнага супрацоўніцтва паміж краінамі, а таксама ўмацавання рэгіянальнай эканамічнай інтэграцыі. На фоне ўзрастання аб'ёму перавозак паміж Азіяй і краінамі ЕАЭС усё больш актуальнай становіцца задача павелічэння прапускной здольнасці і стабілізацыі функцыянавання міжнародных транспартных калідораў, у тым ліку мультымадальных", - дадаў намеснік міністра.

Ён падкрэсліў, што сёння як ніколі важна падтрымліваць сістэмныя пераўтварэнні, умацоўваць гандлёвыя сувязі з партнёрамі па Еўразійскім эканамічным саюзе, а таксама краінамі СНД, Блізкага Усходу, Азіі і Афрыкі.

"Менавіта таму пашырэнне і нарошчванне правазной здольнасці асноўных транспартна-лагістычных калідораў ідзе ў бок Усходняга, Азова-Чарнаморскага і Каспійскага напрамкаў і далей да Персідскага заліва па міжнародным транспартным калідоры Поўнач - Поўдзень. Наша будучыня заключаецца ў забеспячэнні звязанасці нашых краін высокатэхналагічным транспартам. Для гэтага мы гарманізуем свае намаганні, павышаем празрыстасць і распаўсюджванне лепшых практык і кампетэнцый", - сказаў Сяргей Дубіна.

Паводле яго слоў, развіваюцца мультымадальныя перавозкі грузаў. У рамках міжнароднага транспартнага калідора Поўнач - Поўдзень беларускім бокам па заходняй ветцы калідора арганізавана адпраўка двух кантэйнерных паяздоў у Кітай па маршруце Беларусь - Расія - Азербайджан, далей аўтамабільным транспартам па тэрыторыі Ірана з пагрузкай на марское судна ў порце Бендэр-Абас.

Упершыню ў бягучым годзе арганізавана перавозка па ўсходняй ветцы калідора Поўнач - Поўдзень кантэйнерных паяздоў па маршруце Беларусь - Расія - Казахстан - Туркменістан - Іран і далей марскім транспартам у Кітай.-0-