Беларусь прадставіць нацыянальны стэнд на Маскоўскім тыдні інтэр'ера і дызайну 

2 снежня, Масква /Эдуард Півавар - БЕЛТА/. Беларусь упершыню прыме ўдзел у Маскоўскім тыдні інтэр'ера і дызайну і адразу прадставіць свой нацыянальны стэнд. Аб гэтым паведамілі ў Дэпартаменце прадпрымальніцтва і інавацыйнага развіцця Масквы.

Маскоўскі тыдзень інтэр'ера і дызайну пройдзе ўжо сёмы раз 11-14 снежня, пляцоўкай для яго стануць два выставачныя павільёны ВДНГ. "Нацыянальны стэнд - гэта калектыўная экспазіцыя вытворцаў з адной краіны, якая аформлена ў адзіным стылі і ў рамках адзінай канцэпцыі пад куратарствам аднаго або некалькіх знакамітых дызайнераў з гэтай краіны", - адзначылі арганізатары.

Беларусь прадставіць прадукцыю пяці вытворцаў на нацыянальным стэндзе пад слоганам "Дом, у якім хочацца жыць". Мэта экспазіцыі - прадэманстраваць прастору, якая перадае атмасферу і гісторыю краіны, а таксама насычаную цяплом натуральных матэрыялаў ручной работы. Кампаніі прадставяць інтэр'ерную мэблю: канапы, ложкі, крэслы, тэкстыль, вырабы для дэкору дома з лёну і дрэва, прыстасаванні для мяккага асвятлення і калекцыйныя прадметы.

Усяго ў VII Маскоўскім тыдні інтэр'ера і дызайну прымуць удзел больш як 1,2 тыс. кампаній з 15 краін. Гасцей чакаюць не толькі цікавыя прадметы дэкору, але і насычаная дзелавая праграма, імерсіўныя экскурсіі, майстар-класы, розыгрышы і шмат іншага.-0-