26 сакавіка, Мінск /Кар. БЕЛТА/. Беларусь прадоўжыць выконваць абавязацельствы па дзярждоўгу ў поўным аб'ёме, заявіў 25 сакавіка журналістам міністр фінансаў Максім Ермаловіч, перадае карэспандэнт БЕЛТА.
"Мы прадаўжаем выконваць свае абавязацельствы ў поўным аб'ёме. Ніякіх змяненняў у палітыцы Міністэрства фінансаў і Беларусі ў цэлым наконт абавязацельстваў, якія краіна на сябе прыняла, мы не ўносім і прадаўжаем дзейнічаць у строгай адпаведнасці з гэтымі абавязацельствамі", - сказаў Максім Ермаловіч.
За два месяцы бягучага года на пагашэнне дзяржаўнага доўгу было накіравана $366 млн, на абслугоўванне - $157 млн. Да канца года на пагашэнне і абслугоўванне трэба будзе накіраваць каля $3,1 млрд. "Ніякіх праблем з выкананнем гэтых абавязацельстваў не бачым. Ёсць поўная ўпэўненасць у тым, што мы забяспечаны крыніцамі для такога пагашэння, - падкрэсліў міністр. - Дысцыпліна плацяжоў па дзяржаўным доўгу - гэта прыярытэт бюджэтнай палітыкі, які абазначаны кіраўніком дзяржавы, і мы ад яго адыходзіць не маем намеру".
Ён звярнуў увагу, што Міністэрства фінансаў правяло значную работу па ўдасканаленні сістэмы кіравання дзяржаўным доўгам, дыверсіфікавала партфель сваіх пазык і магчымасці прыцягнення рэсурсаў з розных крыніц. "Дастаткова развіты ўнутраны рынак, на якім прысутнічаюць дзяржаўныя каштоўныя паперы. Гэта дае магчымасць нам у любых, нават складаных сітуацыях забяспечваць высокую кіруемасць дзярждоўгу", - адзначыў Максім Ермаловіч.
У сувязі з пандэміяй каранавіруса сітуацыя на сусветных фінансавых рынках застаецца дастаткова складанай. Паводле ацэнкі Мінфіна, магчымасці пазыкі на гэтых рынках для краін, якія сталі на шлях развіцця, істотна знізіліся, Беларусь не размяшчала еўрааблігацыі на фоне высокай валацільнасці рынкаў.
"Што датычыцца пагашэння абавязацельстваў Рэспублікі Беларусь, то нягледзячы на тое, што для большасці краін, якія сталі на шлях развіцця, рынак еўрабондаў цяпер закрыты, у нас ёсць і альтэрнатыўныя магчымасці прыцягнення рэсурсаў, якія мы цяпер прапрацоўваем, ёсць магчымасць нарасціць аб'ёмы размяшчэння на ўнутраным рынку ў замежнай валюце", - пракаменціраваў кіраўнік Мінфіна.
Паводле яго слоў, рэзервы для разлікаў па знешніх абавязацельствах Міністэрства фінансаў мэтанакіравана назапашвала ў папярэднія гады. "Калі раней трэк быў па больш плаўным зніжэнні дзярждоўгу, захаванні гэтых рэзерваў, то ў бягучым годзе мы можам гэтыя рэзервы задзейнічаць больш актыўна і разлічыцца па гэтых абавязацельствах", - растлумачыў Максім Ермаловіч.
Разам з тым міністр адзначыў, што своечасовае прыняцце рашэнняў міжнароднымі фінансавымі арганізацыямі па стабілізацыі глабальнага фінансавага рынку будзе садзейнічаць фарміраванню станоўчых чаканняў з боку інвестараў, больш хуткаму аднаўленню фінрынку.
"Што датычыцца выканання абавязацельстваў па еўрабондах, нашых двухбаковых адносін з банкамі, сістэмнымі інвестарамі, міжнароднымі фінансавымі арганізацыямі, мы будзем выконваць усе прынятыя на сябе абавязацельствы дакладна ў тэрмін і незалежна ад таго, як будзе развівацца сітуацыя ў далейшым", - падкрэсліў міністр.-0-
