Беларусь імкнецца вывесці на катарскі рынак мясную прадукцыю

4 чэрвеня, Мінск /Кар. БЕЛТА/. Беларускія спецыялісты сур'ёзна працуюць над вывадам на рынак Катара мясной прадукцыі. Перспектывы аграрнага партнёрства абмяркоўваліся ў час перагавораў намесніка міністра сельскай гаспадаркі і харчавання Івана Смільгіня з дэлегацыяй Катара, якая прыбыла ў Мінск для ўдзелу ў адкрыцці міжнароднай спецыялізаванай выстаўкі "Белагра-2025", паведамілі БЕЛТА ў прэс-службе сельскагаспадарчага ведамства.

За 2024 год тавараабарот харчовых тавараў і сельгассыравіны паміж краінамі вырас у два разы ў параўнанні з 2023 годам. Аснову беларускага экспарту склалі згушчанае малако і вяршкі, малочная сыроватка, тварог і сыры, рыбапрадукцыя.

Як дадалі ў Мінсельгасхарчы, на гэты момант вядзецца актыўная работа па выхадзе на рынак Катара беларускай мясной прадукцыі. Беларусь прайшла ўжо працэдуру акрэдытацыі па стандарце "Халяль", што адкрывае магчымасці для паставак мяса. Застаюцца тэхнічныя пытанні - узгадненне ветэрынарных сертыфікатаў і інспекцыя беларускіх прадпрыемстваў катарскім бокам. Па выніках перагавораў быў выпрацаваны алгарытм работы паміж ветэрынарнымі ведамствамі для наладжвання паставак мяса птушкі на катарскі рынак.

"Беларусь мае вялікі экспартны патэнцыял і гатова ўмацоўваць супрацоўніцтва з Катарам у сферы сельскай гаспадаркі", - рэзюмавалі ў Міністэрстве сельскай гаспадаркі і харчавання.-0-