9 снежня, Сочы /Уладзімір Мацвееў - БЕЛТА/. Беларусь і Расія сур'ёзна зблізілі пазіцыі па нафце і газу. Аб гэтым журналістам у Сочы 7 снежня па выніках перагавораў прэзідэнтаў Беларусі і Расіі заявіў міністр эканамічнага развіцця РФ Максім Арэшкін, перадае карэспандэнт БЕЛТА.
"Сёння быў напружаны дзень. На самай справе вельмі плённа папрацавалі па шэрагу напрамкаў. Па сельскай гаспадарцы, сувязі, па мытні, рэгуляванні нафтавага рынку. Дасягнулі вельмі сур'ёзнага працэсу, нават па пытанні нафты і газу пазіцыі былі вельмі сур'ёзна збліжаны", - сказаў міністр.
Паводле яго слоў, далей з панядзелка на экспертным узроўні будзе пачата дзейная прапрацоўка атрыманых указанняў. "Для таго каб усё гэта сфармуляваць і пагрузіць у дарожныя карты. Затым будзем дакладваць прэм'ерам, прэзідэнтам", - удакладніў Максім Арэшкін.
"У нас ужо невялікая колькасць спрэчных пытанняў засталася перад гэтымі двума днямі. Цяпер іх стала яшчэ менш. Мы разумеем, як па большай частцы з іх рушыць наперад. Нам указанні дадзены. Цяпер будзем прапрацоўваць і далей рухацца наперад", - дадаў ён.
У пачатку верасня на ўзроўні прэм'ер-міністраў Беларусі і Расіі былі ўзгоднены праект праграмы дзеянняў па выкананні саюзнага дагавора і пералік дарожных карт. Бакі дамовіліся аб распрацоўцы 31 дарожнай карты для рэалізацыі гэтай праграмы. Пасол Беларусі ў Расіі Уладзімір Сямашка 20 лістапада паведамляў, што бакі поўнасцю ўзгаднілі 21 дарожную карту.
Напярэдадні ў Сочы адбылася сустрэча прэм'ер-міністраў Беларусі і Расіі Сяргея Румаса і Дзмітрыя Мядзведзева, на якой бакі абмяркоўвалі адпаведную тэматыку напярэдадні перагавораў на вышэйшым узроўні. У прыватнасці, разглядаліся нявырашаныя пытанні па інтэграцыі ў Саюзнай дзяржаве. Па стане на раніцу 6 снежня засталося ўзгадніць 16 пытанняў па інтэграцыйных картах. Пасля сустрэчы сам-насам перагаворы прадоўжыліся ў пашыраным фармаце з удзелам урадавых дэлегацый. З беларускага боку ўдзельнічалі першы віцэ-прэм'ер Дзмітрый Крутой, віцэ-прэм'ер Ігар Ляшэнка, міністр фінансаў Максім Ермаловіч, міністр энергетыкі Віктар Каранкевіч, старшыня канцэрна "Белнафтахім" Андрэй Рыбакоў і іншыя кіраўнікі дзяржорганаў.
Раней таксама паведамлялася, што праграма дзеянняў будзе мець рамачны характар. Усе канкрэтныя пытанні будуць распісаны ў дарожных картах. Пасля дарожных карт плануецца пачаць работу над нарматыўнымі актамі на працягу 2020 года. Пры гэтым ужо цяпер у розных сферах ёсць розная ступень уніфікацыі. Запуск жа адзіных рынкаў па асноўных сферах чакаецца з 1 студзеня 2021 года. Але могуць быць адхіленні з улікам сектаральных асаблівасцей.
Трэба адзначыць, што беларуска-расійскія перагаворы ў Сочы прайшлі напярэдадні 20-годдзя падпісання Дагавора аб стварэнні Саюзнай дзяржавы.-0-
