13 верасня, Мінск /Кар. БЕЛТА/. Беларусь і Кітай выйшлі на аптымальную схему ўзаемадзеяння ў ваенна-тэхнічнай сферы - ад паставак у інтарэсах дзвюх краін да сумесных распрацовак і вытворчасці высокатэхналагічнай прадукцыі. Размова аб гэтым ішла на пасяджэнні двухбаковага каардынацыйнага камітэта па супрацоўніцтве ў галіне ўзбраенняў і ваеннай тэхнікі, якое праводзілася ў Мінску 11-13 верасня. Такая інфармацыя размешчана на сайце Дзяржаўнага ваенна-прамысловага камітэта (ДВПК), паведамляе БЕЛТА.
Адкрываючы пасяджэнне камітэта, кіраўнік яго беларускай часткі, старшыня Дзяржкамваенпрама Раман Галоўчанка адзначыў, што асаблівы, стратэгічны характар адносін паміж дзвюма краінамі выбудоўваецца паслядоўна і дынамічна па ўсёй структуры ўзаемадзеяння. Размова ў тым ліку ідзе і аб ваенна-тэхнічнай сферы, у якой бакі, паводле слоў Рамана Галоўчанкі, выйшлі на аптымальную схему ўзаемадзеяння - ад паставак прадукцыі ваеннага прызначэння ў інтарэсах дзвюх краін да сумесных распрацовак і вытворчасці высокатэхналагічнай прадукцыі.
У сваю чаргу кіраўнік кітайскай часткі камітэта, намеснік начальніка Галоўнага ўпраўлення развіцця ўзбраення і ваеннай тэхнікі Цэнтральнага ваеннага савета КНР Лю Шэн правёў ўсебаковы і змястоўны аналіз вынікаў ваенна-тэхнічнага супрацоўніцтва дзвюх краін. Ён даў высокую ацэнку дасягнутым поспехам у гэтай галіне і падкрэсліў, што ваенна-тэхнічнае супрацоўніцтва з'яўляецца важным паказчыкам стратэгічнага партнёрства Беларусі і Кітая, мае моцны палітычны фундамент і развіваецца на прынцыпах узаемавыгаднага даверу. "Абаронна-прамысловыя комплексы і Кітая, і Беларусі маюць свае перавагі і ў цэлым узаемадапаўняюць адзін аднаго, маюць добры патэнцыял і перспектывы для далейшага развіцця", - сказаў Лю Шэн.
Бакі абмеркавалі вынікі выканання дамоўленасцей, дасягнутых у чэрвені 2018 года ў Пекіне на папярэднім пасяджэнні каардынацыйнага камітэта. Адзначалася, што за справаздачны перыяд ужо выкананы або знаходзіцца ў стадыі завяршэння шэраг важных і тэхналагічна складаных праектаў. Вызначаны таксама перспектыўныя напрамкі ўзаемавыгаднага супрацоўніцтва, якія знайшлі адлюстраванне ў падагульняючым пратаколе пасяджэння каардынацыйнага камітэта ў Мінску. Подпісы пад дакументам паставілі кіраўнікі беларускай і кітайскай частак. Акрамя таго, на пасяджэнні падпісаны шэраг камерцыйных кантрактаў.
У час двухбаковай сустрэчы 12 верасня Раман Галоўчанка і Лю Шэн адзначылі высокі ўзровень дасягнутага ўзаемадзеяння і пацвердзілі ўзаемную зацікаўленасць у развіцці ваенна-тэхнічнага супрацоўніцтва паміж Беларуссю і Кітаем. Яны падвялі вынік работы экспертнай групы і акцэнтавалі ўвагу на найбольш важных пытаннях парадку дня пасяджэння каардынацыйнага камітэта. Акрамя таго, кітайская дэлегацыя ў час свайго візіту ў Беларусь наведала прадпрыемствы Дзяржкамваенпрама.-0-
