20 лістапада, Мінск /Кар. БЕЛТА/. Беларусь і Казахстан плануюць па выніках года наблізіцца да тавараабароту ў памеры $1 млрд. Аб гэтым заявіў сёння журналістам Надзвычайны і Паўнамоцны Пасол Казахстана ў Беларусі, пастаянны паўнамоцны прадстаўнік Казахстана пры статутных і іншых органах Садружнасці Ермухамет Ертысбаеў. Ён прыняў удзел у пасяджэнні Савета пастаянных паўнамоцных прадстаўнікоў дзяржаў СНД пры статутных і іншых органах Садружнасці ў Выканкаме СНД, перадае карэспандэнт БЕЛТА.
"Прэзідэнты Беларусі і Казахстана паставілі задачу давесці тавараабарот паміж краінамі да $1 млрд. Я думаю, у гэтым годзе мы зможам блізка падысці да гэтай лічбы. Гэта вельмі важны паказчык, таму што чым большы тавараабарот, тым большыя паступленні ў бюджэты. Прыемна адзначыць яшчэ і той факт, што Беларусь і Казахстан падпісалі дагавор аб сацыяльна-эканамічным супрацоўніцтве да 2026 года", - сказаў Ермухамет Ертысбаеў.
Гаворачы пра краіны Садружнасці, ён дадаў, што аб'ём узаемнага гандлю за мінулы год вырас на 25 працэнтаў і склаў $164 млрд. "Гэта даволі вялікія лічбы. І самае галоўнае, што дынаміка росту назіраецца і ў бягучым годзе. Пры гэтым трэба адзначыць, што львіную долю тут складаюць Беларусь, Казахстан і Расія", - канстатаваў пасол.
Ён падкрэсліў, што больш як за чвэрць стагоддзя СНД паказала сябе даволі эфектыўнай арганізацыяй. "Па-першае, Садружнасць не дазволіла разарваць гістарычныя вузы паміж народамі, міжгаспадарчыя і міжэканамічныя сувязі, якія былі ў СССР. І ў той жа час дала магчымасць умацаваць суверэнітэт краін, якія ўвайшлі ў гэта аб'яднанне", - упэўнены Ермухамет Ертысбаеў.-0-