28 сакавіка, Мінск /Кар. БЕЛТА/. Беларусь гатова супрацоўнічаць са Свярдлоўскай вобласцю па пастаўках электробусаў. Аб гэтым расказаў намеснік генеральнага дырэктара ААТ "Кіруючая кампанія холдынга "Белкамунмаш" Алег Быцко на пасяджэнні рабочай групы Міністэрства прамысловасці Беларусі і ўрада Свярдлоўскай вобласці Расіі, перадае карэспандэнт БЕЛТА.
"Цяпер мы выконваем чатыры вялікія кантракты. Гэта тралейбусы з аўтаномным ходам для Санкт-Пецярбурга, Екацярынбурга, для Краснадара яшчэ і без аўтаномнага ходу, а таксама трамвайныя вагоны для Ніжняга Ноўгарада. Калі Екацярынбург праявіць інтарэс да ўкаранення электробуснага руху, мы гатовы прапанаваць умовы і паслугі. Мы выпускаем электробусы рознай канфігурацыі - з начной зарадкай, з экспрэс-зарадкай. У нас ёсць вялікі вопыт эксплуатацыі такіх электробусаў, таму зможам рэалізаваць такія праекты ў Свярдлоўскай вобласці", - расказаў Алег Быцко.
Па трамваях сітуацыя крыху горшая, таму што ў рэгіёне ўжо ёсць уласны вытворца трамвайных вагонаў. "Пакуль перспектыў для супрацоўніцтва мы не бачым", - рэзюмаваў ён.-0-
