5 лютага, Мінск /Кар. БЕЛТА/. Беларусь абмяжоўвае ўвоз птушкі з Паўднёва-Чэшскага края Чэхіі і Трнаўскага края Славакіі з-за птушынага грыпу. Такая інфармацыя размешчана на сайце Дэпартамента ветэрынарнага і харчовага нагляду Мінсельгасхарча, паведамляе БЕЛТА.
Паводле даных Сусветнай арганізацыі аховы здароўя жывёл, у названых раёнах зарэгістраваны выпадкі захворвання птушак на высокапатагенны грып. У сувязі з гэтым з 5 лютага ўведзены часовыя абмежаванні на ўвоз у Беларусь з гэтых рэгіёнаў Чэхіі і Славакіі жывой птушкі, інкубацыйнага і харчовага яйка, мяса птушкі, яечнага парашку, меланжу, альбуміну і іншых харчовых прадуктаў перапрацоўкі курынага яйка, пуху і пер'я, не падвергнутых дэзынфекцыі паляўнічых трафеяў (птушынай дзічыны), іншай прадукцыі.
Прыпыняюцца ўсе раней выдадзеныя дазволы на ўвоз названых тавараў у Беларусь з гэтых рэгіёнаў.
Дэпартамент інфармуе аб неабходнасці дадатковай біялагічнай аховы птушкагадоўчых аб'ектаў усіх форм уласнасці.
Грып птушак - кантагіёзная хвароба, якая характарызуецца прыгнечанасцю, ацёкамі, пашкоджаннем органаў дыхання, стрававання. Эканамічны ўрон ад гэтага захворвання вялікі ў сувязі з масавай гібеллю захварэлых птушак, неабходнасцю правядзення строгіх каранцінных і ветэрынарна-санітарных мерапрыемстваў, уключаючы знішчэнне хворай птушкі.-0-
