20 студзеня, Мінск /Кар. БЕЛТА/. Беларусь абмежавала ўвоз свініны з Уладзімірскай вобласці Расіі з-за афрыканскай чумы свіней (АЧС). Такая інфармацыя размешчана на сайце Дэпартамента ветэрынарнага і харчовага нагляду Мінсельгасхарчу, паведамляе БЕЛТА.
Паводле інфармацыі Сусветнай арганізацыі аховы здароўя жывёл, на тэрыторыі Уладзімірскай вобласці зарэгістраваны выпадкі захворвання ўспрымальных відаў жывёл на афрыканскую чуму свіней. У сувязі з гэтым з 22 студзеня ўводзяцца часовыя абмежаванні на ўвоз у Беларусь з гэтага расійскага рэгіёна жывых свіней, заапаркавых і цыркавых жывёл успрымальных відаў, свініны (у тым ліку мяса дзікоў) і іншай харчовай свінагадоўчай сыравіны, а таксама прадуктаў іх перапрацоўкі, гарбарнай, рогакапытнай і кішачнай сыравіны, шчаціння, паляўнічых трафеяў, атрыманых ад жывёл успрымальных відаў, іншай прадукцыі.
У дэпартаменце інфармуюць аб неабходнасці прыняць дадатковыя меры для біялагічнай абароны свінагадоўчых комплексаў усіх форм уласнасці.
Афрыканская чума свіней (хвароба Мантгомеры) - віруснае захворванне свойскіх свіней і дзікоў. Вакцыны ад яго няма. Амаль усё пагалоўе хворых жывёл гіне. Для чалавека АЧС бяспечная.-0-