Барташ: паглыбленню супрацоўніцтва з Таджыкістанам садзейнічае ўдасканаленне сумесных вытворчасцей

5 чэрвеня, Мінск /Кар. БЕЛТА/. Паглыбленню гандлёва-эканамічнага супрацоўніцтва з Таджыкістанам садзейнічае ўдасканаленне сумесных вытворчасцей. Аб гэтым сказаў журналістам міністр сельскай гаспадаркі і харчавання Сяргей Барташ, падводзячы вынікі 17-га пасяджэння Беларуска-таджыкскай міжурадавай камісіі па пытаннях гандлёва-эканамічнага супрацоўніцтва, перадае карэспандэнт БЕЛТА.

"Для паглыблення гандлёва-эканамічнага супрацоўніцтва паміж нашымі краінамі стаіць задача ўдасканалення сумесных вытворчасцей. Напрыклад, прадпрыемства, якое перапрацоўвае наша малако і вырабляе малочную прадукцыю, даўно планавалася, аднак запусцілася ў Таджыкістане пасля аналагічнага пасяджэння міжурадавай камісіі на іх пляцоўцы. Другі не менш важны напрамак супрацоўніцтва - зборачныя вытворчасці (беларускай тэхнікі ў Таджыкістане. - Заўвага БЕЛТА). Сёння патрабуецца пашырэнне плошчаў, лінейкі выпускаемай тэхнікі і асартыменту. Цікава таджыкскаму боку і зборачная вытворчасць апрацоўчай тэхнікі, не застануцца ўбаку аўтатранспарт і транспарт жыллёва-камунальнай гаспадаркі", - расказаў Сяргей Барташ. Міністр падкрэсліў, што новы імпульс супрацоўніцтву паміж дзяржавамі-партнёрамі надаюць прамыя кантакты. "Акрамя таго, важна падводзіць вынікі і ацэньваць работу, што дае штуршок да далейшага развіцця", - адзначыў ён.
Міністр сельскай гаспадаркі Рэспублікі Таджыкістан Курбон Хакімзада таксама абазначыў сферу інтарэсаў сваёй краіны ў Беларусі. "Мы ўжо некалькі гадоў купляем у Беларусі племянную буйную рагатую жывёлу для развіцця гаспадарак. У 2023 годзе набылі прыкладна 2 тыс. пагалоўя. Так, адно з прадпрыемстваў Таджыкістана займаецца гадоўляй племяннога пагалоўя для яго далейшай рэалізацыі. Штогод у Беларусі мы купляем бульбу: аб'ёмы закупкі ў мінулым годзе склалі 800 тон. У бягучым годзе лічбы плануем павялічыць", - сказаў ён.

Яшчэ адна пазіцыя беларускага экспарту ў Таджыкістан - насенне лёну. "Мы ж у сваю чаргу паставілі ў Беларусь доследны варыянт насення сафлора - алейнай культуры. Таксама можам забяспечваць Беларусь насеннем таматаў і агуркоў для вырошчвання ў цяплічных гаспадарках. У нас у гэтым плане набыты багаты вопыт", - адзначыў міністр.

Курбон Хакімзада дадаў, што з канца красавіка - пачатку мая ў Таджыкістане ўжо збіраюць ураджай свежай бульбы, яблыкаў, чарэшні і абрыкосаў. "У вас яшчэ холадна. Наладзіўшы схему лагістыкі, мы можам пастаўляць у Беларусь усю гэту прадукцыю. Тыя аб'ёмы, якія існуюць, нязначныя. Тым больш што кіраўнікі нашых дзяржаў паставілі для нас планку. Ёсць патэнцыял, магчымасці, таму трэба працаваць", - падкрэсліў ён.

Кіраўнік таджыкскай дэлегацыі таксама выказаў агульную думку сваіх калег пасля наведвання пляцоўкі "Белагра-2024". "Уражаны яе размахам, асабліва тэхнікай. Мы ўбачылі навінкі, у прыватнасці агрэгаты для глебаапрацоўкі, плугі, якія могуць прымяняцца нават у горных умовах. У Таджыкістане адкрыта беларуска-таджыкскае прадпрыемства "Агратэхсэрвіс", дзе вядзецца зборка трактароў МТЗ. І патрэбнасць у тэхніцы вельмі высокая", - заўважыў міністр.

Паводле яго слоў, кожны таджыкскі фермер, які здымае некалькі ўраджаяў у год, добра ведае тэхніку гэтай маркі. І цікавасць у таджыкскіх сельгасвытворцаў ёсць не толькі да беларускіх трактароў, але і да камбайнаў. "Ёсць дамоўленасць куплі камбайнаў прадпрыемства "Гомсельмаш", якое мы будзем наведваць у рамках візіту ў Беларусь. Хацелася б пашырыць супрацоўніцтва і з Бабруйскім заводам трактарных дэталей і агрэгатаў", - дадаў Курбон Хакімзада. Краіны таксама гатовы наладзіць абмен для падрыхтоўкі спецыялістаў у галіне сельскай гаспадаркі, а таксама студэнтаў для праходжання практыкі.

У ходзе пасяджэння прадстаўнікі беларускага і таджыкскага бакоў абмеркавалі стан і перспектывы гандлёва-эканамічнага, інвестыцыйнага супрацоўніцтва, транспарту і лагістыкі, сферу прамысловай кааперацыі, магчымасці ўзаемадзеяння ў адукацыі, медыцыне, а таксама міжрэгіянальнае супрацоўніцтва. Па выніках форуму міністры падпісалі пратакол пасяджэння Беларуска-таджыкскай міжурадавай камісіі па пытаннях гандлёва-эканамічнага супрацоўніцтва. Таксама падпісаны мемарандум аб узаемаразуменні па ўдасканаленні сістэмы ідэнтыфікацыі, рэгістрацыі і маніторынгу жывёл паміж Цэнтрам інфармацыйных сістэм у жывёлагадоўлі Рэспублікі Беларусь і Цэнтрам лічбавізацыі і павышэння кваліфікацыі кадраў сельскай гаспадаркі Рэспублікі Таджыкістан.