9 чэрвеня, Масква /Эдуард Півавар - БЕЛТА/. Беларускі бок плённа супрацоўнічае з Рассельгаснаглядам, усе рознагалоссі засталіся ў мінулым. Аб гэтым сказаў карэспандэнту БЕЛТА намеснік міністра сельскай гаспадаркі і харчавання Беларусі Аляксей Багданаў сёння на праводзімым у пасольстве Беларусі ў Маскве Беларуска-азіяцкім форуме.
"У нас з Рассельгаснаглядам ніякіх праблемных пытанняў па вялікім рахунку няма, ёсць бягучыя нейкія моманты, якія мы вырашаем у рабочым парадку, і працуем вельмі цесна ў штодзённым кантакце", - сказаў Аляксей Багданаў, адказваючы на пытанне, ці захаваліся цяпер нейкія рознагалоссі з гэтым расійскім наглядным ведамствам, якія мелі месца раней.
"Мы не адчуваем ніякіх праблем у рабоце з нашымі партнёрамі. На гэтым рынку (расійскім. - Заўвага БЕЛТА) нас вельмі добра ведаюць, тавары з маркай "Зроблена ў Беларусі" карыстаюцца высокім попытам у расійскага спажыўца", - падкрэсліў намеснік міністра.
Аляксей Багданаў таксама паведаміў, што за першыя чатыры месяцы гэтага года экспарт беларускіх прадуктаў харчавання ў Расію павялічыўся на 4,9 працэнта ў параўнанні з аналагічным мінулагоднім перыядам і дасягнуў $1,4 млрд. Імпарт прадуктаў харчавання з Расіі ў студзені-красавіку ўзрос на 8,1 працэнта і склаў $495 млн.-0-
