23 верасня, Мінск /Кар. БЕЛТА/. Важны баланс дзяржаўных і прыватных інтарэсаў, узаемаразуменне ўлады і бізнесу. Аб гэтым заявіў сёння журналістам міністр антыманапольнага рэгулявання і гандлю Аляксей Багданаў, перадае карэспандэнт БЕЛТА.
"Прадпрымальніцкае асяроддзе і развіццё канкурэнцыі ўзаемазвязаны і вельмі важныя для эканомікі дзяржавы. Што датычыцца гандлю, ён практычна ўвесь прыватны. Вельмі важна, каб мы знаходзілі баланс узаемадзеяння дзяржаўных і прыватных інтарэсаў. Важна, каб прыватны бізнес разумеў патрэбнасці дзяржавы і народа. Нам удаецца знаходзіць кантакт і ўзаемаразуменне. Яскравы прыклад - наша пагадненне з гандлёвымі сеткамі аб сацыяльнай скідцы", - сказаў Аляксей Багданаў.
Ён адзначыў, што МАРГ узмацняе кантроль за цэнаўтварэннем. "Пры росце колькасці кантрольных мерапрыемстваў мы бачым зніжэнне сум і аб'ёмаў парушэнняў. Але яны ёсць. Мы стараемся выкарыстоўваць прынцып мяккага рэгулявання, мяккага права - у пачатку даём папярэджанні, рэкамендацыі. Але калі паўторнае парушэнне - мы не цырымонімся, адпраўляем справу ў суд, назначаецца штраф", - падкрэсліў міністр.
Актыўна ідзе работа і ў сферы імпартазамяшчэння. МАРГ кожны год аналізуе тавары, якія неабходна замясціць. "У нас на сайце размешчаны пералік такіх тавараў. Бізнес можа яго паглядзець і ўкласці імпартазамяшчальныя тавары ў свае праграмы развіцця", - звярнуў увагу Аляксей Багданаў.
Саюз юрыдычных асоб "Рэспубліканская канфедэрацыя прадпрымальніцтва" 22 верасня правёў бізнес-форум на тэму: "Развіццё прадпрымальніцтва ў Рэспубліцы Беларусь як адна з важнейшых задач сацыяльна-эканамічнага жыцця краіны". Форум прымеркаваны да ўрачыстага мерапрыемства, прысвечанага святкаванню 15-годдзя з дня стварэння канфедэрацыі.-0-
