11 чэрвеня, Мінск /Кар. БЕЛТА/. Пашырэнне занятасці жанчын праз рэалізацыю прадпрымальніцкай ініцыятывы - дадатковая крыніца росту эканомікі. Аб гэтым заявіла намеснік начальніка галоўнага ўпраўлення рэгіянальнага развіцця і маёмасных адносін - начальнік упраўлення маёмасных адносін Мінэканомікі Ірына Бабачонак, выступаючы з дакладам у якасці асноўнага спікера другой сесіі другой падрыхтоўчай сустрэчы 29-га Эканоміка-экалагічнага форуму АБСЕ, арганізаванага шведскім прадстаўніцтвам АБСЕ, паведамілі БЕЛТА ў прэс-службе Міністэрства эканомікі.
У фокусе анлайн-сустрэчы знаходзіўся шырокі спектр пытанняў: пашырэнне эканамічных правоў і магчымасцей жанчын як ключавы фактар у дасягненні ўстойлівага і інклюзіўнага развіцця, міру, бяспекі і стабільнасці, садзейнічанне жаночаму прадпрымальніцтву і роўнаму ўдзелу жанчын у бізнесе і гандлі, а таксама ўстойліваму развіццю за кошт пашырэння правоў і магчымасцей жанчын у сферах аховы навакольнага асяроддзя, гандлю і транспарту.
Ірына Бабачонак выступіла з дакладам на тэму: "Узаемадзеянне дзяржаўных, грамадскіх і фінансавых інстытутаў па пытаннях пашырэння эканамічных магчымасцей жанчын і пераадолення гендарных адрозненняў у бізнесе".
Яна паведаміла, што пры ўрадзе Беларусі дзейнічае Нацыянальны савет па гендарнай палітыцы, які аб'ядноўвае дзяржаўныя, грамадскія і фінансавыя інстытуты. Адным з напрамкаў яго дзейнасці з'яўляецца аналіз фактараў, якія маюць негатыўны ўплыў на пашырэнне магчымасцей жанчын для занятку ўласнай справай, а таксама выпрацоўка мер па іх устараненні.
Прадстаўнік Мінэканомікі падрабязна расказала аб сістэме развіцця і стымулявання жаночай актыўнасці. "На першы план выходзяць пытанні кансультацыйнай, больш нават псіхалагічнай падтрымкі жаночага прадпрымальніцтва, ментарства, пазітыўныя прыклады іншых жанчын-прадпрымальнікаў, падтрымка СМІ па шырокім асвятленні гісторый поспеху, бізнес-навучанне. Калі жанчыны будуць і ў далейшым уваходзіць у прадпрымальніцтва і паказваць важкія вынікі, расказваць свае гісторыі, грамадства ў выніку перастане іх недаацэньваць. Па прынцыпе "знізу ўверх", гэта значыць ад патрэбнасцей выбудоўваецца іерархічная сістэма развіцця і стымулявання жаночай дзелавой ініцыятывы ў нашай краіне. Пашырэнне занятасці жанчын праз рэалізацыю прадпрымальніцкай ініцыятывы - дадатковая крыніца росту эканомікі", - адзначыла яна.
Ірына Бабачонак сфармулявала рэкамендацыі, зыходзячы з беларускага вопыту, якія могуць станоўча паўплываць на дзелавую актыўнасць жанчын: развіццё інфраструктуры для ўстанаўлення балансу паміж сям'ёй і работай, пашырэнне акадэмічнай і бізнес-адукацыі, што ўлічвае гендарна-абумоўленыя патрэбнасці, ментарская і інфармацыйная падтрымка.
Даклад прадстаўніка Беларусі быў высока ацэнены з практычнага пункту гледжання і замацаваў за Беларуссю ролю актыўнага ўдзельніка эканамічнага вымярэння АБСЕ.-0-
