2 сакавіка, Мінск /Кар. БЕЛТА/. Азербайджанская кампанія Socar плануе адправіць танкер з нафтай для Беларусі з турэцкага порта Джэйхан 5-6 сакавіка, паведаміў ТАСС намеснік начальніка дэпартамента па арганізацыі мерапрыемстваў і сувязях з грамадскасцю кампаніі Ібрагім Ахмедаў.
"Плануецца 5-6 сакавіка адправіць з Джэйхана танкер з нафтай для Беларусі. Аб'ём адпраўляемай нафты складзе каля 85 тыс. т", - сказаў Ібрагім Ахмедаў.
Як паведамлялася раней, Беларусь дамовілася з Socar аб пастаўцы двух танкераў нафты - гэта каля 160 тыс. т. У Беларусь нафта будзе дастаўлена праз Украіну па нафтаправодзе Адэса - Броды. Для падрыхтоўкі перапампоўвання Міністэрства антыманапольнага рэгулявання і гандлю ўстанавіла тарыфы на паслугі па транспарціроўцы нафты з Украіны на Мазырскі НПЗ.
У сакавіку таксама чакаецца пастаўка ў порт Клайпеды 160 тыс. т расійскай нафты для беларускіх НПЗ, якая была куплена праз трэйдараў без прэміі.
Акрамя таго, у сакавіку нафту без прэміі ў Беларусь будуць пастаўляць шэсць расійскіх кампаній, сярод якіх "Сафмар" і пяць новых для Беларусі пастаўшчыкоў. У прыватнасці, расійская група кампаній "Сафмар" паставіць 300 тыс. т нафты, "УДС нафта" - 50 тыс. т.
Віцэ-прэм'ер Ігар Ляшэнка паведаміў БЕЛТА, што ў бягучым годзе на беларускія НПЗ для перапрацоўкі пастаўляецца каля 1 млн т нафты ў месяц. Такі ж аб'ём прадугледжаны на сакавік.-0-
