29 красавіка, Мінск /Кар. БЕЛТА/. Разглядаюцца комплексныя змяненні падыходаў да работы Беларускага рачнога параходства. Аб гэтым сказаў міністр транспарту і камунікацый Аляксей Аўраменка падчас наведвання РТУП "Беларускае рачное параходства", паведамілі БЕЛТА ў прэс-службе Мінтранса.
Парадкам дня нарады стала абмеркаванне арганізацыі эфектыўнай работы параходства. У прыватнасці, размова ішла аб рэарганізацыі прадпрыемства з улікам падзелу перавозачнай і партовай дзейнасці. Аляксей Аўраменка адзначыў, што галоўнай мэтай сустрэчы стала вызначэнне сумесна з мясцовымі органамі ўлады канкрэтных прапаноў - кароткатэрміновых мер, якія дадуць магчымасць наладзіць работу рачнога параходства.
"Разглядаліся розныя варыянты комплексных змяненняў падыходаў да дзейнасці Беларускага рачнога параходства. У самыя кароткія тэрміны неабходна прапрацаваць кожны з іх і распрацаваць адпаведны бізнес-план, а таксама фінансава-эканамічныя абгрунтаванні маючых адбыцца змяненняў", - сказаў міністр. Ён падкрэсліў, што гэта датычыцца бягучага стану, арганізацыйнай структуры і планаў па развіцці на далейшую перспектыву.
У сваю чаргу генеральны дырэктар рачнога параходства Андрэй Касьянюк заўважыў, што змяненні дадуць магчымасць аптымізаваць сістэму прадпрыемства, вызначыць прыярытэтныя задачы прававога і фінансавага характару.
На нарадзе таксама абмяркоўвалася пытанне кадравай работы і павышэння кваліфікацыі работнікаў.
РТУП "Беларускае рачное параходства" ажыццяўляе перавозку грузаў і пасажыраў. У яго склад уваходзяць восем партоў, якія знаходзяцца ў трох абласцях краіны.-0-