18 верасня, Магілёў /Кар. БЕЛТА/. Арміраваныя цэментна-мінеральныя лісты для будаўнічых патрэб будуць выпускаць у Магілёве, паведаміў карэспандэнту БЕЛТА дырэктар ТАА "Махіна-ТСТ" Юрый Мільто.
У гэтым годзе дадаткова да асноўнага асартыментнага пераліку кампанія распрацавала ўласную армагрунтавую сістэму падпорных сцен, а таксама запусціла вытворчасць тканай бясшвовай геаабалонкі для тэкстыльна-пясчаных паляў. У 2025 годзе будзе рэалізаваны новы праект па вытворчасці арміраваных цэментна-мінеральных лістоў для патрэб грамадзянскага і прамысловага будаўніцтва. Яго магутнасць складзе да 800 тыс. кв.м прадукцыі ў год.
Таварыства з абмежаванай адказнасцю вырабляе геасінтэтычныя матэрыялы, тэхнічны тэкстыль, тынкавальныя фасадныя і спецыяльныя арміруючыя сеткі, а таксама іншую профільную прадукцыю, якая шырока запатрабавана ў сферы дарожнага, чыгуначнага і прамыслова-грамадзянскага будаўніцтва, горназдабыўной прамысловасці.
Больш за 90 працэнтаў тавараў, якія вырабляюцца, пастаўляюцца на экспарт. За гады работы прадпрыемства рэалізавала прадукцыю больш як у 40 краін свету. Цяпер у лік асноўных пакупнікоў уваходзяць кампаніі-рэзідэнты з Расіі, Казахстана, Азербайджана, Саудаўскай Аравіі, ААЭ і шэрага еўрапейскіх краін.
У 2023 годзе кампаніяй выраблена больш за 27 млн кв.м прадукцыі на суму Br68,6 млн. За студзень - жнівень кошт выпушчанай на прадпрыемстве прамысловай прадукцыі ўжо склаў звыш Br47 млн (тэмп росту 113,2 працэнта да ўзроўню мінулага года). У таварыстве з абмежаванай адказнасцю працуюць амаль 260 чалавек, сярэднямесячная зарплата за студзень - жнівень склала больш за Br2,92 тыс.-0-
Фота Алега Файніцкага
Падпісвайцеся на нас у
