19 кастрычніка, Мінск /Кар. БЕЛТА/. Холдынг "АМКАДОР" прэзентаваў навінкі лесанарыхтоўчай тэхнікі, а таксама элементную базу ўласнай вытворчасці, перадае карэспандэнт БЕЛТА.
Сярод навінак - форвардар AMKODOR FF1461 з колавай формулай 6х6, укамплектаваны доследным узорам маніпулятара, універсальны лесавозны паўпрычэп АМКАДОР 2310 грузападымальнасцю 14 т.
"Новая тэхніка зойме дастойнае месца на сусветным рынку прадукцыі ляснога комплексу. Сёння "АМКАДОР" канкурыруе з вядучымі вытворцамі на гэтым рынку. Нягледзячы на ўсе складанасці, звязаныя з увядзеннем санкцый, калектыў прадпрыемства з'яднаўся, кіраўніцтва паставіла неабходныя задачы. І праз зусім кароткі час замешчана імпартная прадукцыя ўласнай вытворчасцю дзякуючы інжынернай думцы, што тут пануе, дзякуючы намаганням супрацоўнікаў, якія дзень і ноч працавалі над чарцяжамі", - сказаў памочнік Прэзідэнта Валерый Бельскі.
Паводле яго слоў, на фоне санкцыйных мер кампанія значна павялічыла аб'ёмы вытворчасці. "Сёння такія вынікі ў большасці прадпрыемстваў нашага прамысловага комплексу. Гэта сведчанне характару беларускага народа, нашых магчымасцей. Упэўнены, калі мы будзем такімі тэмпамі і намаганнямі, з такім жа энтузіязмам ісці наперад, то нас чакае цудоўная, шчаслівая і паспяховая будучыня", - падкрэсліў ён.
У сваю чаргу намеснік прэм'ер-міністра Аляксандр Субоцін адзначыў, што ў святле санкцый холдынгу давялося кардынальна перабудаваць свой бізнес, схему закупкі камплектуючых і продажаў. "Мы бачым, што прадпрыемства з гэтым паспяхова справілася і пачало рабіць камплектуючыя не горшыя за замежныя. Нешта давялося асвоіць з нуля, нешта ўзяць у бліжэйшых суседзяў. У холдынгу прыкметны цесны сплаў навукі і вытворчасці. Адно аператыўна перацякае ў другое і атрымліваецца добры вынік. Машыны, якія сёння былі прадэманстраваны, яскравы доказ таго, - звярнуў увагу ён. - Мы заўсёды хацелі больш вырабляць сваёй прадукцыі, піярыць яе на міжнародных рынках. Гэты бар'ер лішні раз пасадзейнічаў самаразвіццю нашай прамысловасці. Знешнегандлёвае сальда перасягнула $2 млрд. Гэта таксама доказ таго, што мы крыху інакш сталі паводзіць сябе, па-іншаму прадаваць - недзе больш агрэсіўна, больш разумна. У цэлым мы змяніліся і сталі лепшымі".
На выстаўцы таксама былі прадстаўлены ўніверсальныя пагрузчыкі новага пакалення грузападымальнасцю ад 2 да 5 т, універсальны пагрузчык з бартавым паваротам, шматфункцыянальны прычэп, раскідальнік мінеральных угнаенняў, якія ўкамплектаваны элементамі ўласнай вытворчасці.
Акрамя таго, удзельнікі прэзентацыі змаглі азнаёміцца з шырокай лінейкай вузлоў і агрэгатаў машын, створаных у холдынгу ў мэтах замяшчэння замежных аналагаў. Гэта гідрамеханічныя каробкі перадач новага пакалення серый 90 і 120, маніпулятары AMKODOR KF4556 і KF10080, святлотэхнічныя прыборы, акумулятарныя батарэі і элементы электроннага кіравання машынамі ад ЗАТ "АМКАДОР-Белвар", вентылятары для зернесушылак і іншыя ўзоры элементнай базы машын і абсталявання ўласнай вытворчасці. Уся гэта прадукцыя з'яўляецца інавацыйнай.
ААТ "АМКАДОР" - кіруючая кампанія холдынга" створана ў 1927 годзе. Прадпрыемства вырабляе больш за 125 мадэлей і мадыфікацый тэхнікі без уліку варыянтаў апцыянальных камплектацый машын. Колькасць супрацоўнікаў перасягае 6 тыс. Усе прадпрыемствы холдынга інтэграваны ў адзіны тэхналагічны ланцуг. Кожны ўдзельнік спецыялізуецца на выпуску канкрэтных машын, вузлоў і агрэгатаў. У кампаніі пастаянна распрацоўваюць новыя мадэлі тэхнікі і ўдасканальваюць існуючыя.-0-
