Сцяг Серада, 24 красавіка 2024
Усе навіны
Усе навіны
Эканоміка
27 сакавіка 2023, 16:31

Агароднікаў: праекты па прамысловым супрацоўніцтве Беларусі і Зімбабвэ знаходзяцца ў фазе рэалізацыі

27 сакавіка, Мінск /Кар. БЕЛТА/. Праекты па супрацоўніцтве прадпрыемстваў сістэмы Міністэрства прамысловасці Беларусі з партнёрамі з Зімбабвэ знаходзяцца ў актыўнай фазе рэалізацыі. Аб гэтым заявіў першы намеснік міністра прамысловасці Беларусі Аляксандр Агароднікаў у час сустрэчы з пастаянным сакратаром Міністэрства прамысловасці і гандлю Зімбабвэ Мавіс Сібандай, паведамілі карэспандэнту БЕЛТА ў прэс-службе Мінпрама.

У прэс-службе нагадалі, што пакет дакументаў па прамысловым супрацоўніцтве быў падпісаны ў студзені 2023 года на беларуска-зімбабвійскім бізнес-форуме ў Харарэ ў ходзе дзяржаўнага візіту Прэзідэнта Беларусі Аляксандра Лукашэнкі.

Аляксандр Агароднікаў інфармаваў аб ходзе рэалізацыі 3-й фазы праграмы па механізацыі сельскай гаспадаркі Зімбабвэ, у рамках якой ажыццяўляюцца пастаўкі беларускай сельскагаспадарчай тэхнікі, а таксама аб перспектывах паставак кар'ернай тэхнікі. Яшчэ адзін значны праект беларуска-зімбабвійскага ўзаемадзеяння - пастаўка аўтамабільнай пажарнай тэхнікі. Новы перспектыўны напрамак - будаўніцтва і мадэрнізацыя комплексаў для захоўвання збожжавых культур. Як адзначыў Аляксандр Агароднікаў, беларускі бок гатовы стаць надзейным партнёрам у рэалізацыі такіх праектаў.

Першы намеснік міністра прамысловасці Беларусі выказаў упэўненасць у тым, што супрацоўніцтва з Рэспублікай Зімбабвэ мае вялікі патэнцыял для прадпрыемстваў Мінпрама.

Мавіс Сібанда канстатавала наяўнасць спрыяльных умоў і перадумоў для ўзаемавыгаднага супрацоўніцтва. Паводле ацэнкі прадстаўніка Міністэрства прамысловасці і гандлю Зімбабвэ, вялікай папулярнасцю карыстаецца сельскагаспадарчая тэхніка беларускай вытворчасці, якая зарэкамендавала сябе ў афрыканскіх спажыўцоў найлепшым чынам.

У час сустрэчы Мавіс Сібанда прапанавала беларускаму боку таксама разгледзець магчымасць удзелу ў стварэнні сумесных вытворчасцей і інвесціраванні ў шэраг вытворчасцей. "Насельніцтва Зімбабвэ вельмі пазітыўна ставіцца да нашага супрацоўніцтва. Таму мы гатовы працаваць па ўсіх напрамках, якія ўзаемавыгадны для нашых краін", - падкрэсліла пастаянны сакратар Міністэрства прамысловасці і гандлю Зімбабвэ.-0-

Падпісвайцеся на нас у
Twitter
Топ-навіны
Свежыя навіны Беларусі