ДЗЯРЖОРГАНЫДЗЯРЖОРГАНЫ
Аўторак, 28 студзеня 2020
Мінск Суцэльная воблачнасць 0°C
Усе навіны
Усе навіны
Эканоміка
22 мая 2019, 09:42

Аднаўленне транзіту расійскай нафты ў поўным аб'ёме магчыма да канца ліпеня - "Белнафтахім"

Андрэй Рыбакоў
Андрэй Рыбакоў

22 мая, Мінск /Кар. БЕЛТА/. Аднаўленне транзіту расійскай нафты праз Беларусь па трубаправодзе "Дружба" ў поўным аб'ёме магчыма да канца ліпеня, у маі транзіт складзе менш за 7 працэнтаў ад плана, паведаміў 21 мая журналістам старшыня канцэрна "Белнафтахім" Андрэй Рыбакоў, перадае карэспандэнт БЕЛТА.

"На жаль, на тэрыторыі нашай краіны застаецца істотны аб'ём нафты, якая не адпавядае стандарту па хлорарганіцы, - каля 1,2 млн т, што перашкаджае як поўнай загрузцы нашай нафтаперапрацоўкі, так і транзіту нафты па магістральным нафтаправодзе. Можна сказаць, што ў маі толькі менш за 7 працэнтаў транзіту мы забяспечым ад таго, што планавалі", - расказаў Андрэй Рыбакоў.

Мазырскі НПЗ цяпер працуе на сваёй магутнасці па бізнес-плане, "Нафтан" загружаны толькі на 65 працэнтаў.

Паводле яго слоў, беларуска-расійская дарожная карта мерапрыемстваў па замяшчэнні на тэрыторыі Беларусі расійскай нафты, якая мае ў саставе хлорорганіку, на чыстую павінна быць рэалізавана не пазней за канец ліпеня.

"Тэрмін рэалізацыі ўсёй дарожнай карты - да канца ліпеня бягучага года. Гэта максімальны гранічны тэрмін. Ёсць тэхнічныя магчымасці па паскарэнні, але мы павінны разумець, што гэта не зусім стандартная аперацыя (рэверс. - Заўвага БЕЛТА), таму падыходзім з пэўнай доляй асцярожнасці", - сказаў Андрэй Рыбакоў.

Паводле яго слоў, пры спрыяльных абставінах рэалізацыя мерапрыемстваў можа быць паскорана, але нязначна. У любым выпадку беларускі бок будзе прыкладаць усе намаганні, каб вырашыць сітуацыю ў больш кароткія тэрміны, запэўніў старшыня.

Рэалізацыя дарожнай карты прадугледжвае, што ў канцы ліпеня на тэрыторыі Беларусі не павінна застацца нафты з павышанай колькасцю хлорарганікі ў саставе. "Адпаведна, у нас будуць цалкам разблакіраваны як пастаўкі на нашы нафтаперапрацоўчыя заводы, так і магчымасці ў поўным аб'ёме забяспечыць транзітны паток", - растлумачыў кіраўнік "Белнафтахіма".

Андрэй Рыбакоў звярнуў увагу, што дарожная карта змяшчае выключна тэхнічныя моманты, у ёй абазначаны механізмы выцяснення няякаснай нафты з тэрыторыі Беларусі, у тым ліку ў рэверсным рэжыме. "Тэхнічныя моманты адпрацаваны спецыялістамі з абодвух бакоў, і фактычна ўжо ідзе выкананне дарожнай карты", - сказаў ён.

Сістэма нафтаправода "Дружба" забяспечвае пастаўкі нафты на беларускія НПЗ і транзіт нафты ў Еўропу праз Беларусь па двух напрамках - праз Польшчу і Украіну. Польшча на нявызначаны тэрмін спыніла транзіт нафты. Потым гэта зрабіла і Украіна.

Польскі ўрад заявіў, што расійскі бок павінен несці фінансавую адказнасць за пастаўкі няякаснай нафты па нафтаправодзе "Дружба". Паводле слоў прэм'ер-міністра Польшчы Матэвуша Маравецкага, якога цытуе ТАСС, расійскія пастаўшчыкі зрабілі сур'ёзныя лагістычныя і дзелавыя памылкі, і яны павінны за гэта адказаць. Ён адзначыў, што Польшча паклапацілася аб бяспецы паставак нафты. "Мы не можам дапусціць, каб нашы заводы, трубы, уся сістэма пацярпелі з-за паставак расійскай нафты, - сказаў Маравецкі. - Цяпер вядуцца складаныя перагаворы з Расіяй, расійскімі фірмамі, і мы не адмовімся ад нашых умоў".

Раней міністр энергетыкі РФ Аляксандр Новак запэўніваў, што прапампоўка чыстай нафты ў бок Польшчы пачнецца 20 мая. Аднак 21 мая міністр энергетыкі Кшыштаф Тхужэўскі звярнуўся да расійскага калегі з просьбай аб прыняцці тэрміновых мер для хутчэйшага аднаўлення паставак чыстай нафты.

Канцэрн "Белнафтахім" 19 красавіка заявіў аб рэзкім пагаршэнні якасці расійскай нафты Urals, якая паступае транзітам ва ўчастак магістральнага нафтаправода ААТ "Гомельтранснафта Дружба". Колькасць хлорарганічных злучэнняў у саставе нафты перавышала ў дзясяткі разоў гранічныя значэнні стандарту. Абодва беларускія нафтаперапрацоўчыя заводы - Мазырскі НПЗ і ААТ "Нафтан" - вымушаны былі знізіць загрузку магутнасцей і панеслі страты.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі