5 лютага, Гомель /Кар. БЕЛТА/. Для абмеркавання на VI Усебеларускім народным сходзе не можа быць неістотных тэм, важныя ўсе аспекты развіцця краіны. Такім меркаваннем з карэспандэнтам БЕЛТА падзялілася старшыня Гомельскага раённага аб'яднання арганізацый прафсаюзаў Федэрацыі прафсаюзаў Беларусі Ларыса Леглік.
Ларыса Леглік упершыню будзе ўдзельнічаць ва Усебеларускім народным сходзе. "Адчуваю адказнасць, паколькі прадстаўляю тысячы людзей свайго рэгіёна, ад рабочага да дзяржслужачага. Спадзяюся, што на сходзе адбудзецца аб'ектыўнае, падрабязнае абмеркаванне, у тым ліку і нашых прапаноў, якія накіраваны на паляпшэнне становішча работнікаў, удасканаленне сацыяльна-працоўных адносін, развіццё сельскіх населеных пунктаў", - расказала яна.
Прафсаюзы раёна актыўна падышлі да падрыхтоўкі прапаноў для УНС. "У ходзе пасяджэння Савета раённага аб'яднання прафсаюзаў мы выпрацавалі шэраг прапаноў па ўнясенні змяненняў у Канстытуцыю. Яны датычыліся пытанняў палітычнага ладу, выбарчай сістэмы, развіцця і ўмацавання мясцовага самакіравання і іншых аспектаў", - растлумачыла Ларыса Леглік.
Раённая прафсаюзная дыялогавая пляцоўка таксама акумулявала прапановы, якія ўжо накіраваны ў арганізацыйны камітэт па падрыхтоўцы народнага сходу. "Яны датычацца правоў грамадзян у сацыяльна-працоўнай сферы, найбольш вострых праблем прававога рэгулявання сацыяльна-працоўных адносін. Узнімаліся тэмы развіцця сельскіх населеных пунктаў, абмяркоўваліся ініцыятывы і прапановы Федэрацыі прафсаюзаў Беларусі і, вядома ж, мы іх падтрымалі. У ходзе дыялогавай пляцоўкі на кандытарскай фабрыцы "Летож" сумесна з прадстаўнікамі ўлады і прыватных прадпрыемстваў абмеркавалі праблемы развіцця малога і сярэдняга бізнесу", - падзялілася дэлегат.
Не засталася ўбаку ад абмеркаванняў і моладзь. "Сумесна з прадстаўнікамі ўлады і раённай арганізацыі БРСМ прайшла дыялогавая пляцоўка з маладымі спецыялістамі Гомельскай птушкафабрыкі. Актыўна ўзнімаліся пытанні маладзёжнай палітыкі і самарэалізацыі маладых людзей. Ад маладых мам паступіла прапанова па пытанні скарачэння водпуску па доглядзе дзіцяці да дасягнення ім 3 гадоў, якое абмяркоўваецца апошнім часам. Аднак прапануецца ўводзіць новую норму дыферэнцыравана, з індывідуальным падыходам. Важна ўлічваць стан здароўя дзіцяці, яго гатоўнасць у раннім узросце сацыялізавацца пры паступленні ў дзіцячы сад. Закранута было і паняцце патрыятызму, як прывыць гэта пачуццё ўласнаму дзіцяці, а таксама многія іншыя тэмы", - расказала прадстаўнік ад паўднёва-ўсходняга рэгіёна.
Ларыса Леглік пераканана: дыялогавыя пляцоўкі і грамадскія прыёмныя даюць магчымасць для сустрэч, выказвання меркавання, унясення прапаноў. "Але яны не дадуць выніку без рэальных спраў, канкрэтнай работы, якая выконваецца кожным чалавекам на сваім рабочым месцы. Таму, прадстаўляючы прафсаюзы свайго рэгіёна, тым, хто даў мне квоту даверу быць дэлегатам народнага форуму, магу паабяцаць, што прадоўжу работу ў рамках справядлівага падыходу ў вырашэнні праблем як у калектыве, так і вырашэнні пытанняў асобнага чалавека. Мая работа, як і раней, будзе накіравана на садзейнічанне ў стварэнні ўмоў бяспечнай і камфортнай работы, абарону інтарэсаў членаў прафсаюза, развіццё сацыяльнага партнёрства. Прадоўжым і стварэнне пярвічных прафсаюзных арганізацый у прыватным сектары эканомікі - кожны чалавек мае права на дапамогу, падтрымку і абарону. Толькі сумеснымі намаганнямі ў рамках канструктыўнага дыялогу можна вырашыць усе хвалюючыя пытанні і прадоўжыць будаўніцтва незалежнай дзяржавы", - рэзюмавала прафсаюзны лідар.
Ларыса Леглік - член прафсаюза з 1989 года. У снежні 2019 года выбрана старшынёй Гомельскага раённага аб'яднання арганізацый прафсаюзаў Федэрацыі прафсаюзаў Беларусі, у лютым 2020 года на VIII з'ездзе ФПБ - членам Савета ФПБ. Узнагароджана нагрудным знакам "Прафсаюзны Знак Пашаны", юбілейным медалём "115 гадоў прафсаюзнаму руху Беларусі".-0-
