28 сакавіка, Гомель /Кар. БЕЛТА/. У кампаніі "Беларуснафта" маюць намер мадэрнізаваць 250 зарадных станцый для электракараў у гэтым годзе, паведамілі БЕЛТА на прадпрыемстве.
Плануецца таксама дабавіць раздымы кітайскага стандарту GB/T. Такі крок у кампаніі звязваюць з павелічэннем папулярнасці кітайскіх электрамабіляў. Каб не ўзнікала праблем з іх зарадкай, вырашана аснашчаць аб'екты такімі раздымамі.
Кампанія таксама пашырае сетку суперхуткіх зарадак. Да 2030 года плануецца адкрыць 86 такіх суперхуткіх комплексаў, 26 з якіх будуць у Мінску, а астатнія размесцяць у рэгіёнах.
На пачатак гэтага года ў краіне пад брэндам Malanka працавала 627 электразарадных станцый і адзін суперхуткі заправачны комплекс у Мінску. Плануецца, што да канца 2023 года сетка будзе налічваць 689 станцый, адкрыецца восем суперхуткіх заправачных комплексаў.-0-
