20 лістапада, Мінск /Кар. БЕЛТА/. Задача дзіцячай кінаіндустрыі - вярнуць сем'і ў залы. Такім меркаваннем з карэспандэнтам БЕЛТА падзялілася член журы конкурсу фільмаў для дзіцячай і юнацкай аўдыторыі "Лістападзіка" Ганна Пендракоўская.
"Адна з самых галоўных умоў дзіцячага кіно - каб яго можна было і хацелася паглядзець у кінатэатры. У нас цяпер адна з самых галоўных задач дзіцячай кінаіндустрыі - вярнуць сем'і ў залы", - сказала Ганна Пендракоўская. І дадала: "Таму што дзіцячае кіно - гэта яшчэ і мастацкі прадукт. Акрамя сюжэта, забаўляльнага боку, у яго закладзена эстэтычная і мастацкая адукацыя дзіцяці. І кіно - самы дзейсны і даступны сродак. Вельмі важна, каб сем'і глядзелі фільмы ўсе разам", - падкрэсліла член журы.
Ганна Пендракоўская падзялілася і важным для сябе прынцыпам адносна дзіцячага кіно: "Пасля кожнага фільма ў душы дзіцяці павінен застацца светлы вынік. Дзеці нацэлены на жыццё і будучыню. Таму фільмам акунаць яго ў негатыў і асуджэнне нельга", - сказала яна.
У гэтым годзе на конкурс фільмаў для дзяцей і юнацтва "Лістападзік" было пададзена 317 заявак з больш як 20 краін. Да ўдзелу былі дапушчаны 8 карцін. Усе яны ўжо адгледжаны, і сёння ў кінатэатры "Піянер" у 17.30 урачыстае закрыццё конкурсу, на якім назавуць пераможцаў.-0-
