Залаты фонд і новыя пастаноўкі. Сольны канцэрт прадставіць Акадэмічны ансамбль танца ў Мінску

28 лютага, Мінск /Кар. БЕЛТА/. Канцэрт "65 гадоў на сцэне", прымеркаваны да юбілею заслужанага калектыву Рэспублікі Беларусь Дзяржаўнага акадэмічнага ансамбля танца Беларусі, пройдзе ў Белдзяржфілармоніі 1 сакавіка, паведамілі БЕЛТА ва ўстанове культуры.

Ужо 65 гадоў старэйшы беларускі прафесійны калектыў народнай харэаграфіі захапляе гледачоў сваёй творчасцю. Акадэмічнаму калектыву ёсць што паказаць гледачам. Яго рэпертуар уключае больш за 100 пастановак у самых розных і нечаканых жанрах: народныя і этнічныя, сучасныя і гістарычныя танцы, харэаграфічныя сюіты і мюзіклы-балеты. Пастаноўшчыкі і выканаўцы ансамбля ідуць дарогай эксперымента, шукаюць новыя формы народнага танца ва ўсіх жанрах і напрамках.

У вялікім сольным канцэрце ансамбль пакажа, з якім багажом ён прыйшоў да гэтага дня з моманту ўтварэння калектыву, якія традыцыі і знаходкі харэаграфіі зрабілі ансамбль вядомым у краіне і свеце.

Заслужаны калектыў пад кіраўніцтвам народнага артыста Беларусі Валянціна Дудкевіча пакажа гледачам і залаты фонд беларускай харэаграфіі, і новыя сучасныя пастаноўкі, а таксама дасць магчымасць зазірнуць у свае будучыя прэм'еры. Пачатак мерапрыемства ў 19.00.-0-