11 студзеня, Мінск /Кар. БЕЛТА/. У мэтах вызначэння лепшых выдавецкіх праектаў, якія сталі падзеяй у нацыянальным кнігавыданні, павышэння мастацкай і паліграфічнай культуры беларускай кнігі, далейшага развіцця кніжнага мастацтва, папулярызацыі лепшых дасягненняў выдавецтваў рэспублікі за 2020 год Міністэрствам інфармацыі будзе праведзены 60-ы нацыянальны конкурс "Мастацтва кнігі". Такая інфармацыя размешчана на сайце ведамства, паведамляе БЕЛТА.
"Просім да 22 студзеня прадставіць ва ўпраўленне выдавецкай і паліграфічнай дзейнасці Мінінфарма (пр-т Пераможцаў, 11, каб. 523) лепшыя выданні, выпушчаныя ў 2020 годзе. Па кожнай заяўленай намінацыі ад выдавецтва прадстаўляецца не больш за 3 выданні", - расказалі ў ведамстве.
Галоўнай намінацыяй стане Гран-пры конкурсу "Трыумф". Пераможцу будзе ўручаны дыплом імя Ф.Скарыны і памятны знак-сімвал "Вялікі залаты фаліянт".
Пераможцам тэматычных намінацый будуць уручаны спецыяльныя дыпломы і памятныя знакі-сімвалы "Малы залаты фаліянт". Выдаўцы могуць прадстаўляць свае работы па тэматычных намінацыях: "Мая Беларусь" (лепшыя кнігі пра Беларусь, якія выхоўваюць любоў да сваёй радзімы, патрыятызм); "ЛІТ-фармат" (выданні літаратурна-мастацкага напрамку); "Падручнік новага стагоддзя" (выданні вучэбнага напрамку); "Фотапогляд" (фотаальбомы, фотакнігі); "Разам з кнігай мы расцём" (кнігі для дзяцей і юнацтва); "Залатыя скрыжалі" (даведачныя і энцыклапедычныя выданні); "АРТ-кніга" (выданні па выяўленчым мастацтве, факсімільныя, рэпрынтныя, бібліяфільскія выданні); "Навука і веды" (навуковыя, навукова-папулярныя выданні); "Духоўнасць" (выданні духоўна-асветнага напрамку).
Спецыяльнымі дыпломамі і памятнымі знакамі-сімваламі "Малы залаты фаліянт" будуць узнагароджаны прызнаныя лепшымі ў спецыяльных намінацыях: "За ўклад у захаванне гісторыка-культурнай спадчыны"; "Сцяжынкамі роднага краю" (выданні, прысвечаныя Году малой радзімы); "Садружнасць" (выдавецкія праекты, створаныя беларускім выдавецтвам і замежным); "У люстэрку часу" (кнігі, выдадзеныя на заказ); "Беларусь помніць" (кнігі, выдадзеныя да 75-годдзя Вялікай Перамогі).
Спецыяльны дыплом і памятны знак-сімвал "Малы залаты фаліянт" будзе ўручаны ў персанальнай намінацыі "Майстэрства" лепшаму ілюстратару кнігі, лепшаму дызайнеру кнігі, лепшаму фотамастаку кнігі.-0-
