15 студзеня, Мінск /Кар. БЕЛТА/. Белтэлерадыёкампанія да 17 студзеня прадаўжае прыём электронных заявак на ўдзел у Нацыянальным адборачным туры конкурсу песні "Еўрабачанне-2020". Аб гэтым БЕЛТА паведамілі ў прэс-службе медыяхолдынга.
"Да 17 студзеня выканаўцы могуць заявіць аб сваім жаданні "праслухацца" ў сценах Белтэлерадыёкампаніі, падаўшы для гэтага ўсе неабходныя дакументы на сайт арганізатара - www.tvr.by. На гэты раз на жывое праслухоўванне запросяць толькі тых прэтэндэнтаў, чые кампазіцыі пройдуць папярэдні кастынг экспертнай фокус-групы. Іх імёны будуць апублікаваны на сайце Белтэлерадыёкампаніі 22 студзеня", - расказалі ў прэс-службе.
27 студзеня на праслухоўванні ў медыяхолдынгу спецыялісты ў галіне тэлебачання, музыкі і шоу-бізнесу вызначаць 12 удзельнікаў фіналу. Колькасць фіналістаў арганізатар можа змяніць як самастойна, так і па прапанове членаў журы. На сайце Белтэлерадыёкампаніі будзе весціся online трансляцыя праслухоўвання.
Да 6 сакавіка вырашыцца галоўная інтрыга нацыянальнага адбору. Тэлегледачоў "Беларусь 1" і "Беларусь 24" чакае шоу, у час якога можна будзе разам з аўтарытэтным журы прагаласаваць за выканаўца. Фіналіст, які набраў у суме найбольшую колькасць глядацкіх і экспертных галасоў, будзе ўдастоены права прадстаўляць нашу краіну на 65-м конкурсе песні "Еўрабачанне" ў Ратэрдаме (Нідэрланды) у маі бягучага года.
Праект праводзіцца Белтэлерадыёкампаніяй - адзіным у Беларусі членам Еўрапейскага вяшчальнага саюза - і Міністэрствам культуры, якое выступае суарганізатарам. Палажэнне аб праекце размешчана на сайце медыяхолдынга.-0-