12 студзеня, Віцебск /Алеся Пушнякова - БЕЛТА/. Лагатып XXXII Міжнароднага фестывалю мастацтваў "Славянскі базар у Віцебску" будзе прадстаўлены ў лютым-сакавіку. Аб гэтым на цырымоніі ўзнагароджання пераможцы конкурсу на дызайн новага лагатыпа паведаміў генеральны дырэктар Цэнтра культуры "Віцебск", дырэктар фестывалю мастацтваў Глеб Лапіцкі, перадае карэспандэнт БЕЛТА.
Новую эмблему фестывалю распрацуюць на аснове варыянта, прапанаванага віцябчанкай Ганнай Тавалжанскай. Таксама ў лагатып уключаць элементы дызайну яшчэ траіх чалавек, чые прапановы зацікавілі кіраўніцтва форуму мастацтваў.
Гендырэктар ЦК "Віцебск" расказаў, што на конкурс прыслалі нечакана вялікую колькасць заявак як прафесіяналы, так і аматары. Многія работы былі дастойныя ўвагі і захаплення, распрацоўкі непрафесіяналаў адрозніваліся смеласцю і навізной. Аднак умовам конкурсу адпавядалі не ўсе лагатыпы, і ў выніку кіраўніцтва фестывалю выбірала з больш як 150 варыянтаў.
Ганна Тавалжанская па прафесіі дызайнер. Паводле яе ўяўлення, знакаміты сімвал фестывалю - васілёк - можа быць выкананы ў стылі канструктывізму. У гэтым прасочваецца ўплыў вялікіх мастакоў, якія стваралі ў Віцебску, - Шагала і Малевіча. Яна ўнесла ў колеравую гаму сімволікі форуму свае любімыя тоны - чырвоны і аранжавы. На распрацоўку лагатыпа, які будзе красавіцца на білбордах, брэндавай прадукцыі, у яе пайшло каля двух тыдняў. Спачатку віцебскі дызайнер вывучыла лагатыпы мінулых фестываляў, затым пастаралася ўнесці ў падагульняючы варыянт сваё бачанне абноўленага стылю. Першым яе работу ацэньваў муж, даваў ёй парады і, вядома, падтрымліваў ва ўсім.
"Дызайн Ганны Тавалжанскай мы бяром за аснову. Канчатковы варыянт лагатыпа мы выберам разам з нашымі мастакамі і ў яго ўключым элементы дызайну яшчэ траіх пераможцаў конкурсу. Напрыклад, у мінчаніна Аляксандра Халсціннікава быў прадстаўлены гатовы маркетынгавы прадукт - лаканічны, пазнаваемы, які выдатна падыходзіць для білбордаў. Стыль Рыната Гаджыева з Віцебска нам спадабаўся за тое, што наш васілёк заплецены ў букет. А варыянт Алены Міклушовай, таксама віцябчанкі, цікавы тым, што ў васілька разнастайнасць пялёсткаў, не падобных адзін да аднаго", - расказаў Глеб Лапіцкі.
Разам з дыпломамі пераможцаў фіналісты конкурсу атрымалі і грашовае ўзнагароджанне, якое падзялілі паміж лідарамі: Ганна атрымала Br600, а астатнія - па Br300.
Дырэктар фестывалю адзначыў, што ў апошнія гады ўзрасла цікавасць гасцей фестывалю на сувенірную прадукцыю. І калі раней хапала ўсяго адной гандлёвай палаткі, якая размяшчалася побач з Цэнтрам культуры "Віцебск", то цяпер з'явілася неабходнасць пашырыць асартымент і павялічыць колькасць гандлёвых кропак, каб любы жадаючы змог набыць сувенір на памяць. Новы лагатып з'явіцца не толькі на брэндавых рэчах, але і на акрэдытацыі ўдзельнікаў форуму.-0-
Фота Аляксандра Хітрова
