10 лістапада, Гомель /Кар. БЕЛТА/. Выстава работ пераможцаў IV адкрытага фестывалю-конкурсу дзіцячай творчасці "Я хачу стварыць цуд", прысвечанага 140-годдзю з дня нараджэння мастака-наватара ХХ стагоддзя Пабла Пікасо, адкрыта ў Гомелі ў карціннай галерэі Г.Х.Вашчанкі, паведамілі карэспандэнту БЕЛТА з дзяржаўнай установе.
"Творчы вопыт, энергія настаўнікаў-мастакоў пад кіраўніцтвам упраўлення адукацыі Гомельскага гарвыканкама, адміністрацыі сярэдняй школы нумар 19 Гомеля ўвасобіліся ў ідэю фестывалю. І вось ужо чацвёрты год ініцыятары падзеі падтрымліваюць цікавасць да сусветнай мастацкай культуры як агульначалавечага здабытку праз прызму творчасці мастакоў, якія ўнеслі уклад у развіццё выяўленчага мастацтва. Фестываль выйшаў далёка за межы школы і прыцягнуў дзяцей не толькі з усіх куткоў Беларусі, але і замежных краін", - расказалі ў дзяржаўнай установе.
У бягучым годзе на суд журы было прадстаўлена больш за 200 творчых работ. Яны ацэньваліся ў трох узроставых катэгорыях у кожнай з намінацый (графіка, жывапіс) па зададзеных тэмах: "Кубізм - раскладзі і складзі", "Прымітывізм - гэта няпроста", "У глыбіні душы", "Тэатр - гэта асаблівая краіна", "Малюю усім, чым хачу", "Колер майго настрою". Лепшыя конкурсныя работы і ўбачаць наведвальнікі выставы.
Арганізатары адзначылі, што асноўнымі задачамі фестывалю-конкурсу стала стварэнне ўмоў для падтрымкі і развіцця творчага патэнцыялу аўтараў, фарміраванне мастацка-эстэтычных адносін да навакольнага свету, да яго духоўна-маральных і культурных каштоўнасцей, а таксама абмен мастацкім вопытам і творчымі дасягненнямі паміж навучэнцамі і педагогамі.
Азнаёміцца з творчасцю юных талентаў у галерэі Г.Х.Вашчанкі можна будзе па 12 снежня.-0-
